السلام عليكم ورحمة الله وبركاتة ....

رغم حالة الاكتئاب البنيوي الذى تملك منى منذ بضع ايام الا انه زاد كل ماشوف حالة المنتدى كدا يعنى يرضيكم يحتد بي الحال واقدم على الانتحار الانترنتي .!!
طبعا انا عرفه حنية قلبكم مش هاهون عليكم اكون شهيدة افعالكم .
الاعزاء

سهران ... قائد المدفعية الهولندية , النجم الثاقب , محمد التوهامى , جلاكسي , زهرة , مصري اصيل نونا وديمق معلش هو لسه منضم جديد بس دا ميمنعش اننا نحمله جزء ن المسئولية ترحيب ورحبنا ورد وجبنا ماية ورشينا بخور وبخرنا .. ايه ها ايه .. ايه النظام ؟ فين بقي مواضيعكم ومشاركاتكم ,عاوزين مواضيع قوية نشارك فيها ونستفيد منكم ومن ارائكم يعنى شايفة اننا كلنا هنا مشاءا الله مجموعة نقاوة المنتديات المفروض يطلع مننا مواضيع وقضايا نناقشها ونستفيد كلنا .

امانى ومصري جدا .. مشاء الله عليهم شغالين كويس

المجموعة الكبيرة بقي

اكرم وبروف واللهو الخفي , وحشيش ودكتور مصابر وراحلة واخت وميزو وشينكاوى وفاين تاتش مش مقصر بس عاوزين يشد حيلة شوية والمصري بردوا شغال وكل الاخوة والاخوات واسامة بك طبعا مبسوط بالاجازة وسايب ولاده هنا فى الحر والرطوبة لما الباروما اكلتنا .
المنتدى بيفكرنى باطفال الحضانات كل ما الطفل من دول يزيد بتاع 500 جرام كدا نفرح ونقول خلاص هيطلع من الحضانة اهو يجيلوا دور نزلة معوية يفقد 1000جرام ويرجع الحضانة تانى بجد بتبقي حاجة محبطة .
احنا بقي هنا كلنا مسئولين عن المنتدى يا نطلعه من الحضانة ونكبره بمواضيعنا يا نخليه بقي طفل مبتسر داخل الحضانة وانتم واختياركم .

بدرورة المخنوقة ( دا اسمى الجديد بالمناسبة لحد ما تشوفولى حل
)

هتكلم عن نفسى

بصراحة يا بدرية الظاهر كده و الله أعلم مش إنتى لوحدك اللى عندك إكتئاب و لامبالاه و باقى الحاجات التانية دى .. الحال من بعضه .. الموضوع زاد بعد ما عرفت خبر وفاة الأفوكاتو .. رحمه الله .. مع إنى معاصرتش الا آخر أيامه و لكن حزنت حزن شديد .. أكتفى بالمتابعة فى كل المنتديات و لا أشارك إلا فى أضيق الحدود .. و تقريبا ده الطبيعى بتاعى .. ربنا يستر طريقنا ( على رأى الأديب حشيش المكنى أبو نوسة )

السلام عليكم

اخواني واحبائي اسعد الله مساءكم

الواضح ان هناك ركود عام في المنتديات قلة مشاركات وقلة مواضيع. واعتقد كلها يا اما الناس في اجازات يا إما حالة من الزهق والطفش الدوري.

انا شايفة اننا مجموعة كبيرة وزى ما قالت بدرية صفوة المنتديات وكلنا لازم يكون لنا دور ننعش بيها حالة الركود دى وطبعا ده مش هيجى الا بالمشاركات والمواضيع وأنا
مع الاخ ديميك ان مغلب الاعضاء فى اجازات طيب اللى مش فى اجازة يورينا الهمة
بقى ويتفاعل ويشترك وانا متأكدة اننا ممكن نعمل من شئون منتدى رائع اكتر من كدة
بس لو كلنا بقينا ايد واحدة ا
اطمنى يا بدورة عمرنا ما هنخزلك ابدا وان شاء الله تنبسطى معانا وننبسط معاكى
وعمرك ما هتنتحرى انترنتيا ابدا و كل اللى زكرتى اسمهم عمرهم ما هيقصروا
وبكرة تشوفى ومش هتبقى ملاحقة على المشاركات

مقدرة كلامك يا نجم لانى تقريبا كنت باعانى من نفس الحالة والحمدلله بفضل نصائح الاخوة وفضل ربنا قبل كل شيء اتفكت الازمة.
وطبعا عندك حق وفاة الاب الفاضل الافوكاتو اثرت علينا كلنا لانه كان من الشخصيات التى لا يمكن ان تصادفها مرتين فى الحياة.
خدلك يوم كمان متابعة وفك عن نفسك وبعدك كدا مش عاوزين دلع عاوزين الهمة وعلى راى اديبنا حشيش بردوة (زمن الانتخه ولى وانتهى) من اقواله المأثورة

صح يا ديمق بس بردوا لازم يراعوا اخواتهم اللى منهال عليهم عرق ورطوبة الشعوب مش هما يصيفوا وينبسطوا ويسبونا هنا حراااااااام [

امانى انا معجبة بيكى اوى وبمجهودك الرائع والله شئون بتطلع مواهب كأنك كنتى محبوسة يا ضنايا ومصدقتى ربنا يكرمك يا رب استمرى وفقك الرب

بداره النواره

أنا عارفه إني مقصره و الله بس حقك عليا

تأكدي إن تقصيري بيكون خارج عن إرادتي

لكن أنا معاكي في كل كلمه قلتيها

و إن شاء الله شئون بوجودك و جود صفوة الأعضاء فيها هتستمر للأمام دائماً

و أنا معاكم و معاكي و بحيكي على مبادرتك الجميله دي

تحياتي لأجمل نجفه و أحلى بدرور

أم كريم

و الله يا جماعه فعلا الفتره اللى فاتت ممكن الواحد يكون مقصر شويه بس لظروف خارجه عن إرادتى مشاكل شغل و شبكه النت اللى فاصله فى البيت يعنى حاجه تخنوء من جميع الاتجاهات.
بس ربنا يسهل ان شاء الله هحاول ادخل حتى و لو هختلس شويه وقت من الدوام علشان نشارك بعض التفكير زى الأول.... و الله الموفق
بدريه: بلاش فكره الانتحار ( انا عارف انك مش بتهزرى و ممكن تنطى من فوق الحصيره) مصر محتاجاكى يا بدريه.

زهرور القومر كان الله فى العون يا فندم وانا عارفه انك مش هتقصري الا للشديد القوى بس يا ريت تلفتى انتباه الجماعة اللى عندك مش معقول انتم الاتنين مشغولين .

القائد ...ربنا يفك اسر النت عندك يا رب ويصلح حالك ومايقطعلك نت خالص وحاضر هاجل موضوع الانتحار دا شوية كمان لما نشوف الظروف هتتعدل ولا لاء

اختكم الفقيرة الى الله

بدرورة

ابنتي وفلذة كبدي وقرة عيني
بدر البدور .. الدر المكنون .. الشهد المسكون (بالعسل من غير دبابير)

لما تيجي تنتحري انترنتيا ابقي قوليلي قبليها بساعة
علشان الحق اكهرب الكمبيوتر بتاعي
وأشنقه فوق باب زويلة

إقتباس

واسامة بك طبعا مبسوط بالاجازة وسايب ولاده هنا فى الحر والرطوبة لما الباروما اكلتنا .

طيب أنا راضي بحكمك لو فيه يوم من غير ما يكون لي مساهمة واحدة على الأقل ... آل في إجازة آآآآآل ..

انت عارفة .. والعارف لا يعرف .. بأن فلسطينيتي تجعل منها مركز اهتمامي ومحرقة روحي ..

نظرة على باب فلسطين المحاصر وهي تدلل لك على مدى مشاركتكم ولو وجدانيا فيما أكتبه وأنقله لكم من أخبار ومقالات وموضوعات..

أحيانا اكون أحترق في الموضوع
ثم لا أجد من الإقبال عليه ما يتناسب مع حرقة دمي وعياطي بصمت فيه ..

http://www.masreyat2.org/ib/index.php?showforum=79

الحال نفسه بكل أسف في مختلف المنتديات غير الفلسطينية التي أشارك فيها


بس ولو
سأبقى على عهدي معكم
فمن شاء أقبل
ومن شاء ادبر
ولسوف يقبل ذات يوم بإذن الله

بدريه حبيبتي ازيك اولا؟
وتحياتي عالموضوع ثانيا
فعلا في حاله ركود غريبه بيمر بيها المنتدي رغم توافد اعضاء جدد وانا اعتبر منهم لكن انا فعلا غبت اسبوع او اكتر عن المنتدي لظروف صحيه ودراسيه بحته رجعت ملقتش كتير فاتني رغم اني كنت متوقعه اني حرجع واحتاج اسبوع مثلا او اكتر عشان الحق الي فاتني والم مواضيع شخصيه زي استاذ اسامه فقط مثلا
الا اني رجعت لاقيت لاجديد تحت الشمس والوضع مستقر والامن مستتب
زي مكنت متوقعه برضه ان حد يسال ولا يقول راحله رحلت لفين انما يلا ماعلينا حاخد علي خاطري شويه وخلاص لكن دا موضوع تاني وهنا مش مجاله العتاب بعدين
فعلا يابدوره غايظاني اوي فتره الركود دي واتمني مطولش اوي عايزين نشاط ياقوم بس انا برا الموضوع دا لظروفي الاكتئابيه المنحدره للحضيض والمنذره باكتئاب مزمن لكن مع الجميع بقلبي وعقلي ووجداني واكتر من هذا يعد طمعا واستغلالا لكرمي

بجد ما تزعلوش مني
النت كان فاصل ده اولا
ثانيا عندي امتحانات و إلهي وحده يعلم الامتحانات ده بتكربني قد ايه
ثالثا الحر فعلا بيسبب حالة من الملل و الركود
رابعا بيبقى في ظروف و إلهي مش في ايد الواحد التحكم فيها
استني بس عليّ اسبوع كدة با بدورة ان شاء الله
يكون اسمه ايه خلص و اسمه التاني خلص
و الاسمه ايه التالت خلص برده
و اجتهد معاكي ان شاء الله

اقدي بعافية بقى

فعلا الاحظ غياب الكثيريين وانا كنت منهم لكن لسببين .. احدهما كان ترك مساحة للاعضاء لإثراء المنتدي وابتعد قليلا لكوني من اداريين المنتدي .. وعقبها اجازة صيف من السنة للسنة ..لإنخرط بعدها ففي مشاعل العمل والحياة ..

لاشك ان حالة الزهق قد تتمكن مني واحالتني لحالة ترقب وانتظار لمشئة الله في تغيير ما لم نفلح في تغييره بانتخابات او بكلام او اي شئ آخر .. ولكن مشئية الله كانت برحيل اعضاء من المنتدي هم الافوكاتو وابوحميد المصري .. ولكلاهما مشاركات اثرت المنتديات المصرية .. رحم الله الفقيدين .. ولايبقي في المداود إلا شر البقر .. وكنا نظنه ضاحكا .. طلع انه بيضحك علينا منذ 27 سنة .. ولازال الهم مستمرا ..