المساعدة - البحث - قائمة الأعضاء - التقويم
أنقذوا مبانينا القديمة الجميلة
منتديات شئون مصرية > منتديات الآداب والفنون > الفنون الجميلة والتطبيقية
1, 2
فانتوماس
بحب إسكندرية اوى...بس بقالى فترة حاسة أن انا غريبة و إن مش هى دى إسكندرية إللى أنا عارفاها
و إللى عشقتها و إللى ناس كتير من مختلف الجنسيات حبوها و عشقوها. البيوت القديمة بتتهد و يطلع مكانها ابراج سكنية او مول او سنتر و ملامح إسكندرية الحقيقية بتتمسح لما بقت شكلها مسخ.
دلوقتى و انا سايقة فى شوارع إسكندرية بلاقى نفسى بدور على البيوت القديمة او اى ملامح من المدينة إللى انا عارفاها و اسأل نفسى يا ترى المبنى ده هيفضل هنا لحد إمتى؟ يا ترى هيعدى وقت قد إيه قبل ما يطلع مكانه برج عشرتشر دور!
الكلام ده الحقيقة مش فى إسكندرية بس ..فى مصر كلها! مبانى عريقة لها تاريخ تتهد او يطلع حواليها مبانى اخرى بستايل معمارى مختلف تماما تؤذى العين. مش عارفة هو إحنا للدرجة دى الجمال مش بيهمنا..هى الناس مش حاسة قد إيه بقت كل حاجة من حوالينا قبيحة و مش منظمة؟!
بصراحة دى حاجة من الحاجات إللى محسسانى بإكتئاب شديد و بقيت حاسة إن انا مليش مكان فى البلد دى ..زى ما البيوت القديمة الجميلة بتتهد و تروح الناس كمان بتتغير و التعامل اليومى بقى صعب اوى.

لقيت نفسى بتخيل ..يا ترى كان هيبقى شكل إسكندرية إيه لو كان أتعملت خطة من 1920s مثلا لتخطيط إسكندرية..بمعنى إن يبقى فيه قوانين و قيود تحكم اى بناء جديد ..يبقى الطراز المعمارى متجانس مع بعضه و يبقى فيه صيانة للمبانى القديمة و حفاظ على المبانى اللى ليها تاريخ..و كان يحصل توسع برضه بس بشكل مختلف..يعنى كل المبانى الحديثة او العمارات الجديدة العالية و المولات و الذى منه يتبنى فى منطقة واحدة بداية من سموحة و فى إتجاه كارفور و بعدها..زى فى باريس كده..حى la defense فيه كل المبانى الحديثة العالية و Office buildings
يتهيألى كانت إسكندرية بقت مختلفة تماما! و كانت أزمة المرور إللى بنعانى منها دلوقتى إختفت..و كان الواحد هيحس بمتعة و هو ماشى فى شوارعها ..يشم هواها التظيف..
كل ما اتخيل الحاجات دى أكتئب اكتر و اكتر..بشوف قصور و بيوت تتباع و اعرف إن خلاص مش هشوفها تانى.. واتخيل يا ترى مين كان عايش هنا اول ما إتبنى ..يا ترى كان يعرف إن هيوصل الحال لكده؟ اعرف اصحاب بيوت فى زيزينيا و جليم و بولكلى و كفر عبده إضطروا يبيعوا بيوت اجدادهم لأن التكلفة بقت عالية اوى عليهم عشان يعيشوا فيها لأنها بتحتاج صيانة و مصاريف كتير و فيه ناس يعرض عليهم اسعار خيالية فيبستسلموا.
فى ظل الإكتئاب ده حسيت مؤخرا بأمل طفيف لأنى عرفت إن فيه مجموعة مش قليلة من الناس بتفكر زى ما انا بفكر و فيه منهم ناس بيحاولوا ينشئوا مجلة تصدر اربع مرات فى السنة تتوعى الناس عن المبانى القديمة و بيحاولوا يعملوا حملة تبرعات عشان يعملوا renovation لمبانى كتيرة فى كل انحاء مصر.
ده مش كفاية طبعا..بس يا ترى إيه ممكن تانى يتعمل..إيه القانون اللى ممكن يمنع مبنى من إنه يتهد و تحافظ عليه الدولة؟
فانتوماس
هحطلكم صور لمبانى كتير فى إسكندرية و القاهرة عشان تشوفوا التحف بتاعتنا..للأسف فيه ناس
كتير مش عارفة إن دى زى اثارنا بالضبط لازم نحافظ عليها ..ده تراثنا و تاريخنا..كل الدنيا بتعمل كده إلا
إحنا..

معظم الصور دى مش من تصويرى ..من تصوير ناس مهتمة بالموضوع ده زيى او من الإنترنت و هتلاقونى كاتبة ان الصورة منقولة

فانتوماس
user posted image
منقول

قصر سباهى فى رشدى على البحر
لو عديته من جنبه القصر جميل جدا ..بس فى حالة يرثى لها و محتاج فعلا شغل كتير عشان يبقى
زى الاول

user posted image
منقول

قصر عائشة فهمى فى جليم
كان عليه مشاكل بين الورثة و شركة إيجوث و بعدين الورثة كسبوا القضية و قالوا مش هيبيعوا
من إسبوعين معدية من جنب القصر لقيتوا مفتوح و مجموعة من الأجانب ..شكلهم مستثمرين واقفين يتناقشوا عند البوابة و بعيدن سمعت إن الورثة هيبيعوا خلاص و هيتحول لفندق خمس نجوم بس يا ريت مايبقاش كارثة تانية زى سان ستيفانو لأن القصر فى حالة جيدة جدا و إن كان لابد يتحول فندق فيبقى زى السلاملك فى المنتزة و يحافظوا على المبنى الاصلى
فانتوماس
user posted image
منقول

المبنى ده من اكتر المبانى إللى بحبها فى إسكندرية...مكانه محطة الرمل على البحر. مش عارفة ده رأيي لوحدى بس انا شايفة أنه جميل جدا و لو تأملتوا فى تفاصيله هتحسه إنه تحفة فنية.

user posted image
منقول

فى الصورة دى تقدروا تشوفوا تفاصيل المبنى..venetian style حاجة فى منتهى الجمال

user posted image
منقول

ودى صورة تانية للمبنى إللى جنبه برضه تحفة ..يا ترى حد عنده اى معلومات عن تاريخ الإتنين دول او المهندس المعمارى إللى صممه؟
فانتوماس
user posted image
منقول

فندق سان ستيفانو القديم....لما بشوف صوره قلبى بيوجعنى و بتحسر فعلا

user posted image
منقول

سان ستيفانو جراند بلازا...فى رأيى ده كارثة..مفهوش اى نوع من الجمال..عبارة عن concrete monster
العقل و المنطق بيقول إن مشروع بالحجم ده ميتعملش فى منطقة زى دى..الlandscape مش متناسق خالص مع بعضه و بعدين بقى على طول فيه أزمة مرور فى زيزينيا و سان ستيفانو من وقت ما المشروع ده إتعمل.
فانتوماس
user posted image
منقول

الصورة دى لقصر فى حى السيدة فى مصر و للأسف الشديد..خلاص اتهد..طبعا هو كان مهمل
crumbling away مش عارفة وزارة الثقافة دى فين ولا بتعمل إيه و إزاى مفيش جهة تحافظ على المبانى دى

user posted image
منقول

الصورة لنفس القصر اللى خلاص مالوش وجود دلوقتى...حاولوا تتخيلوا القصر ده كان شكلوا إيه فى ايامه الاولانية لما كان لسه فيه ناس عندها ذوق
زعلان
فعلا تراث انساني بيروي حكايات و قصص رائعة وجميلة تسمح لنا على الاقل ان نسرح بخيالنا في ازمنة لم نعاصرها للاسف الفساد و الفساد و الفساد و البلطجة طالت كل شيء في مصر
فانتوماس
اقتباس (زعلان @ Nov 8 2007, 01:29 PM)
فعلا تراث انساني بيروي حكايات و قصص رائعة وجميلة تسمح لنا على الاقل ان نسرح بخيالنا في ازمنة لم نعاصرها للاسف الفساد و الفساد و الفساد و البلطجة طالت كل شيء في مصر

شكرا لمشاركتك يا زعلان..الفساد طبعا له دور فى ما وصل إليه الحال بتراثنا الحديث بس مش هو
السبب الوحيد ..اعتقد إن الجهل و اللا مبالاة ليها دور كبير ..و طبعا لو كان فيه ظوابط للبناء و تخطيط
سليم للمدن كانت حاجات كتير إتغيرت.

user posted image
منقول

الصورة دى لمبنى فى هليوبيليس إسمه مبنى eugenie ackaoui من تصميم C.Floridia, 1927
الصورة دى من سنة 1930 و دلوقتى واجهة المبنى الجميل ده مش باينة بسبب إن فيه محلات تجارية و عمارات حديثة حجبت رؤيته و فيه كمان مبنى الحرية مول القبيح.

user posted image
منقول

ده مدخل المبنى دلوقتى..إختفى بسبب المحلات و القباحة و الزحام
قمر الليالي
user posted image

تفاصيل المبنى جميلة جدا

user posted image

يعني المول وخلفه المبنى....مين الي بيخطط وازاي مفيش تنسيق ))3((.gif


ناصر الملك و الملكية الأول
موضوع جميل يا فانتوماس
أحمد باشــا
اقتباس (قمر الليالي @ Nov 8 2007, 09:19 PM)


user posted image

يعني المول وخلفه المبنى....مين الي بيخطط وازاي مفيش تنسيق ))3((.gif [/color]

مفيش مول ...ده واجهات قبيحة للمحلات في نفس المبنى غطت على جمال المبنى

و زحفت حتى على المدخل أللي أصبح شبه مسدود

الأدهى من كل هذه النماذج أن مباني أثرية أسلاميه طالها التشويه المتعمد

و برضو حطوا واجهات زي الأورام و الدمامل
أحمد باشــا
اقتباس (فانتوماس @ Nov 8 2007, 04:32 AM)
user posted image
منقول

قصر سباهى فى رشدى على البحر
لو عديته من جنبه القصر جميل جدا ..بس فى حالة يرثى لها و محتاج فعلا شغل كتير عشان يبقى
زى الاول


مين يفتكر الأفلام أللي أتصورت في القصر ده ؟؟
فانتوماس
قمر و ناصر و اللهو شكرا لمشاركتكم...
ويا ريت يا بشمهندس تقولنا إيه هى الأفلام إللى إتصورت فى قصر سباهى..انا شخصيا معرفش
و عايزين إضافات من حضرتك كمهندس معمارى..إيه إللى ممكن يتعمل لإنقاذ ما تبقى من تراثنا ده
فانتوماس
user posted image
منقول

مبنى Davis Bryan فى القاهرة..كان إسمه كدة لأنه كان فيه department store إنجليزى بالإسم ده فى المبنى ده..بعد كده إشترته أسرة الشوربجى من الشام و اصبح محلات الشوربجى

user posted image
منقول

ده مبنى فى شارع الجمهورية فى القاهرة
أحمد باشــا
اقتباس
عايزين إضافات من حضرتك كمهندس معمارى..إيه إللى ممكن يتعمل لإنقاذ ما تبقى من تراثنا ده


ده كلام جميل جدا و موضوعك مشجع ....على الأقل لي

و لو البدايه كده يبقى فيه موضوعات كامله بأذن الله
فانتوماس
user posted image
منقول

قصر الأمير سعيد حليم...فيه ناس بالخطأ بيقولوا عليه قصر شامبليون..القصر تم بنائه من أجل الأمير سعيد حليم و ملحقش يعيش فيه كتير لأن تم إغتياله بعدها بفترة قصيرة فى أرمينيا و تم تحويل القصر لمدرسة و مع مرور الزمن وصل بيه الحال زى ما إنتوا شايفين كده..فيه بارقة أمل بتقول إن القصر ده هيتم ترميمه و يبقى متحف او حاجة تابع وزارة الثقافة
فانتوماس
user posted image

villa Hug على النيل فى القاهرة...مبنى روعة و إسمه كدة لأنه كان ملك ثرى سويسرى إسمه كدة
قمر الليالي
حرام المباني دي تتساب كده....

الي اعرفه ان الامم المتحده بتخصص مبالغ مخصصه لترميم التراث الحضاري الانساني..وعادة بتتوزع على عدة دول
بتكون فيها مباني تاريخيه زي الي في الصور الي بتعرضيها يا فانتو....

تعرفوا بفكر في الناس الي كانت عايشه في الاماكن دي....سبحان الله من اماكن عامره بالناس حكايات وبدايات ونهايات وافراح واحزان
لمكان فاضي brokbrok.gif
فانتوماس
اقتباس (قمر الليالي @ Nov 9 2007, 03:47 AM)
تعرفوا بفكر في الناس الي كانت عايشه في الاماكن دي....سبحان الله من اماكن عامره بالناس حكايات وبدايات ونهايات وافراح واحزان
لمكان فاضي brokbrok.gif

ده بالضبط إللى بفكر فيه يا قمر.. و غالبا هيصيبنى بالجنون قريب..لأنى بقيت بتمنى على طول إن الزمن يرجع بية للوراء .. كل الصور إللى حططتها هنا عارفين نبذة عنها بس فيه بيوت تانية كتير اوى مانعرفش حاجة عن تاريخها و مهملة جدا و بعدى على كتير منهم كل يوم و نفسى اصورها بس الموضوع ده مش سهل و كتير من الصور إللى جبتهالكم إللى صوروها كان هيتقبض عليهم عشان واقفين يصوروا فى وسط الشارع..بصراحة مش عايزة اتجرر على القسم praying.gif
عارفة ..ساعات لو مجرد وقفت اتفرج على اى مبنى من المبانى القديمة دى بألاقى النظرات إبتدت تتجه ناحييتى و اقول امشى احسن بلاش مشاكل.
فانتوماس
user posted image
منقول

صورة اخرى لقصر سعيد حليم..المدرسة الناصرية سابقا

user posted image
منقول

و دى صورة للقصر من الداخل

قمر الليالي
اقتباس (فانتوماس @ Nov 9 2007, 06:55 AM)
عارفة ..ساعات لو مجرد وقفت اتفرج على اى مبنى من المبانى القديمة دى بألاقى النظرات إبتدت تتجه ناحييتى و اقول امشى احسن بلاش مشاكل.

تصدقي انا كمان لو في نفس المكان هتلاقيني اتامل البيوت ويمكن اتحسسها لو ينفع اقرب منها كتير...

user posted image

جميل جدا
فانتوماس
user posted image
منقول

صورة لمدرسة فيكتوريا فى الأسكندرية...كانت من أعرق المدارس فى مصر و إتخرج منها ملوك و مشاهير بس تدهورت دلوقتى طبعا..يا تري ليه معرفناش نحافظ عليها؟
فانتوماس
user posted image
منقول

مدرسة EBS فى الأسكندرية..كانت برضه من المدارس العريقة لكن طبعا حالها إتغير كتير
حتى المدارس زمان كانت مبانيها تحفة معمارية

user posted image
منقول

صورة تانية لمدرسة EBS

user posted image
و دى صورة لمدرسة EGC

user posted image
و دى صورة للمبنى الجديد للمدرسة ...طبعا شكلة لا يليق ابدا بمستوى المبانى القديمة
فانتوماس
user posted image
منقول

مدرسة الليسيه الفرنسية ..مبانيها فى منتهى الجمال و تمتد على مساحة كبيرة جدا بس حالتها تدهورت جدا دلوقتى

user posted image
منقول

منظر تانى للييسيه

user posted image
منقول

الليسية دلوقتى

قمر الليالي
كنت هكتب كلام كتير يا فانتو عن الموضوع ده بس اتضحت من خلال نقاشي مع اللهو الخفي...ان الموضوع متشعب وليس سهل على الاطلاق brokbrok.gif
فانتوماس
اقتباس (قمر الليالي @ Nov 9 2007, 09:46 PM)
كنت هكتب كلام كتير يا فانتو عن الموضوع ده بس اتضحت من خلال نقاشي مع اللهو الخفي...ان الموضوع متشعب وليس سهل على الاطلاق brokbrok.gif

إيه يا قمورة ...لأ شاركى ولا يهمك ..انا مبسوطة بمتابعتك و يا ريت ماتحرمينيش من رأيك مهما كنتى شايفة الموضوع صعب
أحمد باشــا
المباني ألتي لها طابع متميز أو قيمة فنية أو تاريخية هي للأسف معظمها ملك أفراد أو ورثة أو هيئات مستقلة

و كان قد صدرت عدة قرارات تنظيمية بعدم ترخيص هدم كل أو جزء من هذه المباني

البعض قد تم حصره و البعض الآخر لا ....عموما لا يمكن قانونا هدم فيلا أو قصر ألا بموافقة جهات عليا

طبعا الملاك يلجأون ألى ترك هذه المباني بدون صيانة و تخريبها أن أمكن و ربما بمساعدة بعض أقطاب الفساد

و التحايل على القانون يتم الهدم مثلما حدث مؤخرا في قصر سامي البارودي بالقاهرة

أذن ما المشكلة ؟

المشكلة تكمن أن هذا القصر ذو الطابع المعماري المتميز يحتاج لمبالغ طائلة كنفقات للصيانه و المحافظه عليه

هذه النفقات الطائلة لا يقدر عليها بالطبع مجموعة من الورثه .......بل أن هدم هذا القصر و بيع أرضه خالية يحقق لهم ملايين عديدة

و حتى لو أستطاع مالك المبنى نفقات الصيانه فأنه عمليا ليس على وعي ثقافي خاص يحفزه على ذلك

هو ليس صاحب قضية .......فليقم بذلك من يبغي الحفاظ على هذا الأثر ( هذه وجهة نظره غالبا و لها الكثير من المنطقية )

هناك عمارات سكنية مثلما جاء بهذا الموضوع لها طابع معماري و فني متميز

هذه العمائر يسكنها قاطنون بأيجارات تعد بالملاليم بالنسبة لوقتنا الحاضر

أصحاب هذه العمائر ورثه عديدون أو شركات تأمين أو جمعيات خيرية

قطعا ليس من المنطقي أن يصرفون مبالغ طائلة ليحظى السكان بهذه الأقامة المتميزه شبه المجانية

مكسبهم الحقيقي في خراب و هدم العقار و بيع أرضه خالية

القانون أعطى الحق للمستأجر أن يقوم بترميم العقار على حسابه و يتكفل بالنصف و يخصم النصف مما يدفعه من أيجار

هذه المعادلة العجيبه تجعل المستأجر يقوم بالترميمات الضرورية فقط حتى لا ينهار العقار و ليذهب الشكل و الطابع ألى الجحيم

و تكون هناك عمليات ترميم قبيحة تشوه شكل و أصل المبنى و تجعله مسخا مشوها

الحكومة لا تستطيع ماديا صرف هذه النفقات المهولة لصيانة هذا الكم الهائل من الأبنية

أيضا الحكومة لا تستطيع حتى شراء القليل منها ذو الطابع المتميز....ألا في حالات قليلة جدا و لآسباب خاصة

الحكومة أيضا تمتلك العديد من هذه الأبنية من القصور حصلت عليها في مصادرات بدء قيام الثورة و التأميم

و لكنها تستغلها أبشع أستغلال .....فمعظمها تحول ألى مدارس او مستشفيات أو هيئات حكومية

و عن التشويه فحدث و لا حرج فأستعمال مباني قديمة كهذه بحشر ألوف التلاميذ أو المرضى بها

و تقسيم الصالات بحواجز لأنشاء غرف للفصول أو المكاتب و عمليات صيانة بدائية متخلفة تؤدي لأزالة العناصر

المعماريه الأصلية و أستبدالها بخامات أخرى رديئة أو دهان حوائط أو أسقف عليها رسوماتن أو نقوش بدهان الجير

لقد رأيت بنفسي في قصر يستعمل كمدرسة أعدادية للبنات كيف أنهم قاموا بتركيب بلاط سطوح أعلا أرضيات الباركيه

و كيف تم طلاء أبواب من الخشب الماسيف الماهوجني ببوية لاكية مزرية ....بل دهان حائط به لوحة من الفسيفساء بالبلاستيك

و كيف أن السلم الخشبي قد تآكلت درجاته بفعل أستعمال التلميذات و قد قاموا بتعويضها بألواح صاج

و ألى وقت قريب فأن قلعة محمد علي كانت تستخدم كسجن حربي و دارا للمحفوظات

بل أن الحفاظ على الطابع المتميز لساحل الميناء الشرقي قد قامت بضربه في مقتل الحكومة نفسها ممثلة في وزارة العدل ( تخيل وزارة العدل )

ألتي قامت ببناء مجمع للمحاكم مخالف قانونا و يشوه الطابع المتميز للمنطقة و يكدس يوميا آلاف السيارات للمترددين على المجمع بدون توفير

أي مكان للأنتظار ....الحق يقال أنهم وفروا العديد من أوناش المرور لقبض قيمة المخالفات

المدهش أن أرض هذا المجمع و مبنى النيابة العامة المجاور و مباني أسكان القضاه هي حديقة عامة في الأصل

أذن ما الحل ؟

لا الحكومة تريد أو تستطيع ماليا

و لا الملاك أصحاب قضية أو منفعة بل هم متحفزون للهدم

و لا أصحاب المليارات الجدد لديهم الوعي الثقافي ألذي يحفزهم لأقتناء مثل هذه النفائس

و لا يمكن عمل أستكتتاب عام لأنقاذ هذه المباني لأن الوضع الأقتصادي لا يسمح

أذن ما الباقي ....

ألذي يتبقى هو أصحاب المنفعة و هؤلاء يحميهم قانون الأيجارات القديم

ربما لو تم ألغاؤه سيتغير الحال .....و هذا حل بعيد المنال

لأن الحكومة تخشى من عواقب ألغاء هذا القانون بالذات و ربما ترى أن الحل يكمن في زوال أو هدم كل المباني القديمه ألتي تتمتع بحماية هذا القانون الشاذ


قمر الليالي
الهو الخفي اهو يا فانتو رد وقال محتوى الحوار الي كان مابينا عن موضوعك..

شخصيا المباني شكلها جميل جدا جدا وياريت يكون في حل لاننقاذها ....
بس مدام اصحاب الشأن عايزين يتخلصوا منها دي تبقى مشكلة كبيرة وملهاش حل زي ما قال اللهو
فانتوماس
اقتباس (قمر الليالي @ Nov 10 2007, 01:11 AM)
الهو الخفي اهو يا فانتو رد وقال محتوى الحوار الي كان مابينا عن موضوعك..

شخصيا المباني شكلها جميل جدا جدا وياريت يكون في حل لاننقاذها ....
بس مدام اصحاب الشأن عايزين يتخلصوا منها دي تبقى مشكلة كبيرة وملهاش حل زي ما قال اللهو

طبعا يا قمر كل حاجة اللهو قالها صح بس مش معنى كدة إن مفيش أمل خالص.
فيه منظمة إسمها Euromed Heritage يتم تمويلها من قبل الإتحاد الأوروبى.
المنظمة دى متبنية مشاريع لإحياء التراث فى منطقة البحر المتوسط و من ضمن هذه المشاريع
قصر سعيد حليم إللى سبق و أضفتلكم صوره و عرفت إنه سوق يتم تحويله لمتحف
و قصر و حدائق أنطونيادس و فيه مشروع ضخم جدا لترميمهم ..طبعا المشاريع الضخمة دى بالنسبة
للأماكن و المبانى التى لها تاريخ و أهمية كبيرة.
المشكلة فى البيوت إللى من النوع اللى كلمنا عنه اللهو الخفى...فى رأيى الشخصى فيه شوية حلول للأماكن
دى ممكن تنقذ بعضها..
1) أن تجدد و تستعمل كمقرات لبنوك إستثمارية أو شركات كبيرة.. يبقى على الأقل المبنى إتجدد و محافظين عليه و
طبعا مش هيبقى عندهم مشكلة فى شراء مثل هذه المبانى
2) أن يتم تحويلها إلى مدرسة بس تكون مدارس خاصة..يعنى المدارس الجديدة إللى بتفتح و تبقى مصاريفها بألوفات
تستخدم مثل هذه المبانى كمقر لها و فيه اماكن كتير اوى تصلح لده. طبعا هيهتموا بترميم و صيانة المبانى و المنشأت و هتضيف
وقار و عظمة للمدارس دى
3)فيه فى قصر فى شارع المحافظ إسمه قصر الفارسى و هو ثرى سعودى الجنسية إشترى القصر ده و جدده و رممه
يعنى لو فيه أسر ثرية ممكن بدل ما يشترى ارض و يبنى فيلا جديدة يشترى واحد من القصور او الفلل القديمة و يجددها

طبعا دى حاجة مش سهلة و لو تمت فى واحد من المبانى مش هتم فى عشرة غيرهم
أحمد باشــا
أرجوا أن لا يفهم من كلامي أنه لا أمل في أنقاذ تراثنا المعماري

أنا أردت فقط أن أطرح عمق المشكلة و لماذا يتم تخريب و هدم هذه المباني بصورة متعمدة

أنا أيضا أطرح دوافع ملاك هذه المباني و أتفهمها لكن لا أتبناها

ما لم يكن هناك ثقافة عامة و وعي و أراده لدى الشعب فسنفقد ما لدينا من ثروات لأن الثقافة السائدة عنوانها الجوع كافر

و هدم التراث و بيع أرضه يتزامن معه تجريف الأرض الزراعية و بيع الدولة لأراضي و أصول مصر

عامة العماره و شكلها تخبرنا عن حالة المجتمع بدقة شديدة فهي مرآة الحضارة الصافية

بالنظر لعمارة الثلاثينات مثلا و مقارنتها بعمارة السبعينات من القرن الماضي نستطيع تكوين فكرة واضحة

عن مجمل ثقافة و وعي و أقتصاد و أخلاق و أذواق و حتى ضمائر الصناع و المقارنة فادحة جدا بحق

اقتباس
1) أن تجدد و تستعمل كمقرات لبنوك إستثمارية أو شركات كبيرة.. يبقى على الأقل المبنى إتجدد و محافظين عليه و
طبعا مش هيبقى عندهم مشكلة فى شراء مثل هذه المبانى
2) أن يتم تحويلها إلى مدرسة بس تكون مدارس خاصة..يعنى المدارس الجديدة إللى بتفتح و تبقى مصاريفها بألوفات
تستخدم مثل هذه المبانى كمقر لها و فيه اماكن كتير اوى تصلح لده. طبعا هيهتموا بترميم و صيانة المبانى و المنشأت و هتضيف
وقار و عظمة للمدارس دى


برضه ده متوقف على ثقافة و دافع الناس أللي بتشتري و الجدوى الأقتصاديه

المهم نشر الوعي بين الناس حتى تسود بينهم روح هدفها المحافظه على الطابع و التراث

اقتباس
)فيه فى قصر فى شارع المحافظ إسمه قصر الفارسى و هو ثرى سعودى الجنسية إشترى القصر ده و جدده و رممه
يعنى لو فيه أسر ثرية ممكن بدل ما يشترى ارض و يبنى فيلا جديدة يشترى واحد من القصور او الفلل القديمة و يجددها


سعيد فارسي مهندس معماري و كان زميل دراسة لي و عين محافظ جدة من سنوات عديدة و هو ألذي طور مدينة جدة عصريا في وقته

المقدمه دي توضح خلفية لماذا رمم القصر مع ملاحظة أنه بنى برجين شاهقين على الجزء الأكبر المستقطع من حديقة القصر ألذي لا يمكن هدمه قانونا

يعني في الآخر طلع كسبان من العمليه و لم يخسر من أجل ترميم القصر

و عن تجارب كثيرة أؤكد أن مساعدات الجهات المانحة و المعونات هي فرقعات أعلامية تبغي الدعاية لا أكثر و لا أقل

دعاية مكثفة و شديدة تظهرهم و كأنهم أنقذوا تراث الأسكندرية مثلا ....لكن الحقيقة أنها نقطة في بحر

جدير بالذكر في هذا الموضوع أكبر جريمة ترتكبها الدولة حاليا و هو التخطيط لهدم و بيع أراضي جامعة الأسكندرية

فأذا كان هذا هو التفكير الرسمي للدولة فلا يحق لنا لوم بعض الأفراد

و هنا عينات من سلوك الدولة نفسها

user posted image

التشويه الحادث في منطقة الميناء الشرقي و عدم أحترام خط الأفق و المبنى المخالف لمجمع المحاكم ( على اليمين)



user posted image

قصر المنتزه



user posted image

قصر المنتزه حاليا

فانتوماس
اقتباس
عامة العماره و شكلها تخبرنا عن حالة المجتمع بدقة شديدة فهي مرآة الحضارة الصافية


فعلا يا بشمهندس..و إحنا دلوقتى فى قمة التدهور و حضرتك عنك حق لازم يكون فيه زيادة وعى و تثقيف للشعب
عن أهمية التراث ده و أعتقد إن ده من أهداف المجلة إللى كنت بحكيلكوا عليها..هما غالبا إستقروا على إسم تراث
للمجلة دى بس لسة مش عارفة هي هتبدى إصداراتها إمتى ..
بيتهيألى الجمعيات الخيرية وجمعيات المرأة زى الروتارى و الليونز و جمعية محبى مكتبة الأسكندرية
وغيرهم كتير ممكن يساعدوا بمجهوداتهم..انا مش مشتركة فى أى واحدة منهم بس مؤخرا حضرت مؤتمر برعاية
جمعية سيدات أعمال الإسكندرية و الحقيقة بيعملوا مجهودات كويسة اوى و بيعرفوا يجمعوا تبرعات كتير و بيتبنوا
أفكار كتير كويسة رغم إن ممكن الواحد يفتكر إنهم شوية ستات بيتسلوا و خلاص.
شكرا لإضافتك الرائعة و عايزين اكتر يا بشمهندس
فانتوماس
user posted image
منقول

انا الحقيقة مهتمة بصور المدارس القديمة لأن كلها فعلا مبانيها عريقة و جميلة
دى مدرسة سان مارك زمان و الحقيقة انا بحب المدرسة دى جدا لأنها مدرسة زوجى العزيز و كتير من
قرايبى و لسة عندنا الجيل الجديد مكمل فيها و مازالت المدرسة دى عريقة و لسة محافظة نوعا ما على مستواها
و كمان المبانى بتتجدد دايما و اعتقد إن التلاميذ القدام ليهم دور كبير لأن عندهم ولاء غير عادى للمدرسة
و بيجمعوا تبرعات و ليهم نشاط كويس اوى.

user posted image
منقول

و دى صورة تانية قديمة للمدرسة

user posted image
سان مارك دلوقتى..لسة زى ما هى

user posted image
المكان ده زى ما هو بالضبط ..بس فيه كراسى بلاستيك بدل الخشب..و الكافيتريا زى ماهى برضه
فانتوماس
user posted image
منقول

دى صورة لمدرسة Sacred Heart فى رشدى فى شارع سوريا و المبنى إللى فى الصورة ده للدير إللى كانوا عايشين فيه الراهبات
و كان أصلا قصر ملك لأحد الأثرياء و يقال إن ارضه كانت ممتدة لحد آخر شارع سوريا
دلوقتى مافضلش غير المبنى الرئيسى للمدرسة وللأسف الدير و الحديقة إللى حواليه إتباعوا و لولا الجهود الذاتية كانوا الراهبات إضطروا يمشوا من المدرسة خالص ..بس تم بناء دور فوق مبنى المدرسة عشان يعيشوا فيه.
اما الدير فهو زى ما هو بس إتباع جزء من الحديقة المطلة على شارع سوريا و إتبنت فيها عمارة كبيرة سدت المنظر و حجبت رؤية الدير و المدرسة و بقية الحديقة مهملة و مش زى زمان.
finetouch
تحياتى للاخت فانتوماس لهذا الموضوع المؤلم
قال لنا احد الاساتذة الافاضل عندما كنا طلبه لتحكم على اى مجتمع انظر للمهن المنتعشه...اذا كان المحامى والطبيب منتعشا اذن فهو مجتمع متخلف وفاشل واذا كان المعمارى منتعشا اذن فالمجتمع متقدم
وليس معنى كثرة حركه البناء فى العمارات والمنتجعات هى علامه لتقدم المجتمع
أحمد باشــا
اقتباس
اما الدير فهو زى ما هو


thnk0001.gif



,&,.gif
قمر الليالي
ليه يا لهو هو الدير اتغير والا حاجه؟؟؟
فانتوماس
اقتباس (اللهو الخفي @ Nov 10 2007, 07:30 PM)
اقتباس
اما الدير فهو زى ما هو


thnk0001.gif



,&,.gif

blink.gif أيوة يا بشمهندس..المبنى بتاع الدير لسة موجود فعلا بس الجزء الأكبر من الحديقة بتاعته هو إللى إتبنى فيه عمارتين كبار..إنت شككتنى فى نفسى خلتنى عديت إنهاردة بصيت على المدرسة تانى
فانتوماس
خبر كويس عرفته إنهاردة..يا ترى حد فيكوا عارف الكاتب Lawrence Durrell؟
هو كاتب إنجليزى كتب رباعية تدور أحداثها فى الأسكندرية و إسمها Alexandria Quartet
Durrell كان عايش فى إسكندرية أيام الحرب العالمية و كان عايش فى الدور العلوى لفيلا Ambronفى محرم بك.
فيلا Ambron كانت ملك لثرى إيطالى يهودى إسمه Aldo Ambron و كان بيأجر الفيلا دى و عاش فيها كتير من المشاهير.
الفيلا دى دلوقتى حالتها متدهورة جدا و تقريبا خرابة بس بمناسبة مرور خمسين عام على نشر أول جزء فى رباعية Durrell
و إسمه Justine مكتبة الإسكندرية عاملة مؤتمر من 29 نوفمبر إلى 1 ديسمبر وستقام حملة لإنقاذ فيلا Ambron و ترميمها

user posted image
منقول

للأسف دى الصورة الوحيدة إللى عندى لفيلا Ambron

و ده الإعلان عن المؤتمر
Generations of writers have been inspired by the multi-cultural, outward-looking city of Alexandria. In recent history the most famous literary work by a non-Egyptian author is Lawrence Durrell’s Justine, the first volume of his Alexandria Quartet. To celebrate the 50th anniversary of the publication of his book. The British Council and the Alexandria & Mediterranean Research Centre are co-hosting a programme of events about Durrell, the man, and Alexandria’s continuing influence on writers today.

A walking tour of the city has been specially created for participants in this celebration featuring the key places from the literary works of Durrell and others. These places will also be recorded in a printed map of ‘literary Alexandria’.

Dr Mohamed Awad, leading architect and Alexandrian, will launch a new campaign to save the Villa Ambron - not just as the place Durrell wrote some of his major works, but also the home of influential Egyptian artists Effat Nagui and Saad El Khadim - with a roundtable discussion on the issues surrounding the preservation of heritage sites in times of urban development. Dr Awad will be joined by journalist and editor Mohamed Salmawy and the writers Osama Anwar Okasha and Ibrahim Abdel Meguid.

During the event books by Lawrence Durrell and all the speakers will be available for purchase from the AUC Bookstore.

Date: 29 and 30 November
Place: Bibliotheca Alexandrina.
فانتوماس
user posted image
منقول

لقيت صورة تانية اوضح لفيلا ambron ...مش خسارة إنها توصل لكدة؟؟ 2)))(.gif
أحمد باشــا
مبنى الدير سليم فعلا ...... كمبنى و كل الحديقة أقتطعت و حل محلها 5 عمارات شاهقة

لكن الدير لا يستخدم حاليا كدير .....بقى حاجة تانيه
فانتوماس
اقتباس (اللهو الخفي @ Nov 11 2007, 02:32 PM)
مبنى الدير سليم فعلا ...... كمبنى و كل الحديقة أقتطعت و حل محلها 5 عمارات شاهقة

لكن الدير لا يستخدم حاليا كدير .....بقى حاجة تانيه

أيوة ..تعرف مستخدم فى إيه دلوقتى؟ انا عارفة إن الراهبات دلوقتى عايشين فى الدور إللى إتبنى عشانهم فوق المدرسة. وكمان مقلتلناش أفلام إيه إتصورت فى فيلا سباهى؟
فانتوماس
قصر أنطونيادس ...
user posted image

الحقيقة من الحاجات إللى فرحت فعلا لما عرفتها إن فيه مشروع عالمى لإحياء قصر أنطونيادس و دى شوية معلومات عن القصر عشان تعرفوا أهميته

" الإسكندرية تعيد إحياء قصر انطونيادس ليكون مركزاً عالميا لحوار الحضارات لحوض البحر المتوسط
• مكتبة الإسكندرية ومؤسسة أوناسيس يعيدان بناء التاريخ
• القصر شهد توقيع معاهدة 1936 ومشروع إنشاء جامعة الدول العربية عام 1944 وشهر عسل شاه إيران على الأميرة فوزية
• حدائق القصر تضم مجموعة نادرة من التماثيل الرخامية للآلهة والأساطير اليونانية القديمة
• تحويل حدائق انطونيادس لتصبح مركزاً للدراسات البيئية والزراعية وللحفلات العالمية

تعتبر حدائق انطونيادس من أجمل بقاع الإسكندرية حيث يرتادها المصطافون بالإسكندرية صيفاً وشتاءً ويتمتعون فيها بأجمل المناظر الطبيعية الخلابة ورغم شهرة حدائق انطونيادس بين سكان الإسكندرية إلا أنهم لا يعرفون ما هى حكاية هذه الحدائق وقصر انطونيادس الذى يتوسطها والذى أصبح معلماً منسياً داخل الحدائق تسكنه الحشرات والزواحف، بل حتى الحدائق رغم كثرة مرتاديها إلا أنها أصبحت مهملة ومنسية رغم ندرة الأشجار والورود والزهور بها، ومن أجل إعادة إحياء هذا التراث الرائع وإعادة إحياء تاريخ تناسته الأجيال الجديدة"

و ده اللينك بتاع الموضوع http://www.amwague.net/amwague/28/tahkeekat.asp

و دى شوية صور لأنطونيادس

user posted image
منقول

user posted image
القصر من الداخل

فانتوماس
user posted image
بقية صور قصر أنطونيادس من الداخل ..شئ محزن إنه كان يوصل للدرجة دى بس إن شاء الله كله هيتصلح
user posted image
منقول
فانتوماس
اقتباس (فانتوماس @ Nov 11 2007, 03:30 PM)
اقتباس (اللهو الخفي @ Nov 11 2007, 02:32 PM)
مبنى الدير سليم فعلا ...... كمبنى و كل الحديقة أقتطعت و حل محلها 5 عمارات شاهقة

لكن الدير لا يستخدم حاليا كدير .....بقى حاجة تانيه

أيوة ..تعرف مستخدم فى إيه دلوقتى؟ انا عارفة إن الراهبات دلوقتى عايشين فى الدور إللى إتبنى عشانهم فوق المدرسة. وكمان مقلتلناش أفلام إيه إتصورت فى فيلا سباهى؟

بشمهندس اللهو 18().gif إنت فين مستنية ردك 2))).gif
أحمد باشــا
الدير تم تحويله لكنيسة قبطية

الأفلام أللي أتصورت في أستانلي عموما قديما و حديثا يمكن مئات الأفلام

أما الأفلام في فيلا سباهي فلا أتذكر الأسماء و هحاول أسأل عنها

عموما هي أفلام كتير منها لصباح و فريد شوقي و مريم فخر الدين

سمعت و رأيت أعلانات لسان جيوفاني بأفتتاح مطعم أو فندق له في أنطونيادس على غرار الحرملك

ما هو وسيم ده فرخه بكشك .... سبحان الله بيتفتح له قصور البلد يشتغل فيها و كوبري أستانلي يحود بعيد عنه

موش عارف مشروع تطوير أيه بقى و هم حولوها لسان جيوفاني

لي ملاحظه أخيره : ليس كل مبنى قديم يجب الحفاظ عليه .... المهم أن تكون له قيمة

و على ذلك فأن الكلام عن القصور و الفيلات و المدارس هو جزء يسير من المفروض الحفاظ عليه

فمثلا هناك عمارات ذات طابع و قيمة معمارية متميزه يجب الحفاظ عليها

هناك مباني لها قيمة تاريخية ... اذكر أننا أيام الدراسة أكتشفنا وجود فيلا للمعماري البلجيكي المشهور أوجست بيريه

و كان موجودا بمصر لظروف الحرب و نشأت فكرة مدرسته هنا و كانت لأول مرة بأستعمال الخرسانة المسلحة

الظاهرة ( بدون بياض) و دمجها مع الطوب التيراكوتا في الواجهات ... الفيلا دي في وابور المياه و أصحابها لم يكونوا يعلمون شيئا عن تاريخها ( فيلا آجيون )

user posted image

و كمعلومة بسيطة لوكوربوزيه المعماري الأشهر هو تلميذ لأوجست بيريه

أيضا هناك أعمال عديده لمعماريون أجانب و مصريون ...

هناك أحياء بأكملها أو شوارع لها قيمة متميزة و يتم أندثارها حتى بدون تسجيل أو دراسة

أنا أكتشفت أن مناطق كاملة من البيوت القديمة بأعمار ربما تصل ل 200 سنة أو أكثر وألتي تعبر عن العمارة الأسلامية لا يتم الألتفات لها أبدا

حواري و أزقة كاملة بمنطقة سوق الخيط أو زنقة الستات و شارع الباب الأخضر منها منطقة مخطط لأزالتها لأنشاء كوبري علوي يربط بين الميناء و الكورنيش

برغم أن هذه المنطقة يمكن ترميم شارع أو أثنان بأكملهما و تصبح فندقا كلاسيكيا أو متحف للتاريخ

و أتحدى مدى نجاح هذه المنطقة في الجذب السياحي لها

طبعا ده جهل أننا نلتفت للقصور فقط ... برغم أنه للأسف قد تم تشويهها كلها تقريبا بخنقها بالعمارات الشاهقة حولها

و أيضا بأقتطاع كل مناطقها الخضراء و حدائقها ألتي تعتبر جزء مكمل لها لا غنى عنه و الباقي منها أشلاء

هناك تاريخ حي موجود بالحواري و الأزقة يستطيع أن يعبر عن تاريخنا الحقيقي و ثقافتنا الحقيقية و هويتنا

يعطون للأسكندرية اليوم شكلا أغريقيا أو يعظمون الفترة القصيره للعمارة الأوروبية في تاريخها الطويل

و هذا أدعاء كاذب للأسف ...و كأننا نلبس البرنيطة لرجل يرتدي الجلابية

أعتقد أنه يوجد قانون يحدد أن أي مبنى يزيد عمره عن 150 سنة يعتبر أثر تاريخي

على كده ... عندنا في الأسكندرية مناطق بأكملها ....آثار تاريخية ....لماذا لم يتم تسجيلها ؟؟؟

فانتوماس
اقتباس
هناك أحياء بأكملها أو شوارع لها قيمة متميزة و يتم أندثارها حتى بدون تسجيل أو دراسة

أنا أكتشفت أن مناطق كاملة من البيوت القديمة بأعمار ربما تصل ل 200 سنة أو أكثر وألتي تعبر عن العمارة الأسلامية لا يتم الألتفات لها أبدا

حواري و أزقة كاملة بمنطقة سوق الخيط أو زنقة الستات و شارع الباب الأخضر منها منطقة مخطط لأزالتها لأنشاء كوبري علوي يربط بين الميناء و الكورنيش

برغم أن هذه المنطقة يمكن ترميم شارع أو أثنان بأكملهما و تصبح فندقا كلاسيكيا أو متحف للتاريخ

و أتحدى مدى نجاح هذه المنطقة في الجذب السياحي لها


فعلا يا بشمهندس..مش الفلل و القصور فقط.....فى المنشية كان فيه بيوت جميلة جدا بس فعلا متدهورة دلوقتى و كمان فى محرم بك و كوم الدكة..للأسف الأماكن دى خلاص حالتها يرثى لها.
عارف كمان حضرتك..لو بصيت على مصنع او مخزن إتبنى فى العشرينات او الثلاثينات..فيها برضه نوع من الجمال. الحقيقة فى اماكن كتير من دى نفسى أصورها بس الحكاية مش سهلة كدة..لو حضرتك بصيت على الجراج بتاع الترام إللى فى سيدى جابر..فى وش المنطقة الشمالية..المبنى ده بيعجبنى جدا..مع أنه مجرد جراج لترام ..بس أتحدى لو عرفوا يعملوا زيه دلوقتى
..... على عينه
الاخت الفاضلة فانتوماس
صدقينى موضوعك دة من المواضيع التى تزيد شجنى فانا عندما امر باحد هذة المبانى اقف امامه واقول متى تصل اليك معاول الهدم ابكى على هذة الكنوز والتى لا تقدر بثمن ...لا اعرف لماذا وصلنا الى هذة الدرجات الدنيا اصبح كل شيئ لا يمثل لنا اى قيمة ولا فرق بين المتعلم وبين الجاهل الفلوس والمادة هى اصبحت شاغلنا الاكبر مش مهم ان نرى تمثال من الذهب لا يقدر بثمن وحينما اعثر عليه اذهب الى البيت واقوم باذابة التمثال ومحاولة بيعة كقيمة ذهبية فقط بسعر جرام السوق هناك اكيد خلل فظيع وتدنى كامل لنا فى طريقة التعامل مع كل ما نملك من تراث نسرق اللوحات الفرعونية ونقوم ببيعا للاجانب بابخس الاثمان...وجدت فى متاحف تورينو بايطاليا كام هائل من الآثار المصرية الفرعونية كيف وصلت هذة الكنوز لا اعرف ...من ياترى المسئول ...فى مداخلة اخرى اوضحت انه فى شارع المأمون بمنطقة الرصافة بمحرم بك والتى كانت فى الستينيات عبارة عن اربع فلل كل فيلا تحيط بها حديقة غناء تصل الى عدة افدنة حتى ان فيلا واحدة فى الستينيات تم هدمها وبناء 24 عمارة مكانها من العمارات المتوسطة الحجم يعنى اقصد انها ليست بالعمارات الصغيرة .المهم فى شارع المأمون هناك قصر ربما لا يكون معروفا لاغلب اهل اسكندرية ويقال ان هذا القصر كان لملك ايطاليا فيتوريو ايمانويل وكانت تحيط به حديقى بها من الاشجار النادرة وفى السنوات الاخيرة اخذت معاول الهدم تصل اولا الى الحديقة وتم اقتلاع اشجارها شجرة بعد شجرة فى الظلام واكيد هذا باتفاق مع العاملين فى حى وسط واصبحت الحديقة جرداء ومرتع للفئران والحيوانات القارضة وتم بناؤها الى مجموعة كبيرة من المبانى الخرسانية القبيحة كحال مبانى هذة الايام تجارية قبيحة وربما تسقط على قاطنيها وتصبح مقبرة لمن اراد العيش داخلها ..هذا القصر قمة فى الجمال دخلته فى الستينيات لانه كان هناك مزاد لبيع التحف التى بداخله اعتقد ان هذا القصر لن يدوم طويلا اوعدكم بتصويره لو سمحت لى الظروف فى هذا الصيف باذن الله تعالى...وهناك فى شارع قناة السويس قصر لم ارى مثيل له فى اوروبا حيث ان ملك للقنصلية الصينية على ما اعتقد ..
المهم الآن
من المسئول عن المحافظة على هذة الكنوز انا اعتقد ان الدولة هى المسئول الاول والاخير المسئولة عن ذلك واحساسى ان النظام مش فاضى لهذه الهراءات لان هناك امور اخرى تهمه مثل التوريث ونشر الفساد وتقسيم السلطة بين عائلات معينة داخل المجتمع المصرى وهذة هى الطامة الكبرى...
آسف وجعت دماغكم ولكن الموضوع يستحق ان نموت لاجله اذا كنا مازلنا نحب الجمال ونحب التراث ونتعلق بماضينا وتاريخنا
..... على عينه
الاخت العزيزة فانتوماس
انت جبتينى هنا وسيبتينى لوحدى ....
01!!8.gif 01!!8.gif 01!!8.gif
زعلان
متابعة للموضوع الموضوع جيد جدا و ممميز
اتمنى انه يكون في او يتم تشكيل جمعيات للدفاع و للحفاظ على التارث المعماري للمباني التي شيدت قبل الثورةومر على تشيدها اكثر من 100 عام وبالامكان ايجاد مصادر دخل لها لدعمها والاسهام في ترميم هذه المباني حتى المسكونة منها
..... على عينه
إقتباس(..... على عينه @ 18 Nov 2007, 03:23 PM) *
الاخت العزيزة فانتوماس
انت جبتينى هنا وسيبتينى لوحدى ....
01!!8 01!!8 01!!8


على فكرة يافانتوماس انا حضرت كاميرا تصوير وقلت نقوم نعمل جولة صحفية مع بعض ونقولهم اننا من وكالة التى دبليو ايه العالمية (طبعا لا هى وكالة ولا يحزنون) وماحدش حاسس بحاجة ونصور كل الامامن ذات الطابع التراثى الجميل واهى تبقى حملة على النت قبل ما تقوم معاول الهدم بازالتها الى الابد بس باين عليكى مش عايزة تردى علينا ...على الاقل لنطمئن عليك
.
Invision Power Board © 2001-2014 Invision Power Services, Inc.