فكرة حلوة ممكن من خلالها عرض الهويات مع أضافة خبرتنا فى تلك الهواية زى مابيقول حشيش

طيب ياللا بينا على بركه الله
عندنا تربيه حمام و طيور زينه :كناريا و استرالى و كوكاتيل وفيشر و ببغاوات كبيره متكلمه.
اسماك زينه
قطط
كلاب
نباتات داخل المنزل و نباتات خارجيه
انواع صبار وعصاريات
جمع عملات
جمع طوابع

و ايه تانى يا اخوانى ؟

الفروسية كمان من الهويات الجميلة

المهم نبدأ

وأنا ممكن أبدأ بهواية تربية الحمام لأنى ابنى عندة مجموعة جميلة

بس حد يقولى إزاى أنزل الصور على المنتدى

و انا موافق على موضوع الهوايات و عن نفسى فأنا أجند نفسى للإجابه عن أى سؤال خاص بتربيه الكلاب و تربيه الأسماك الزينه

وأنا أضيف بخبراتي الشخصية والكبيره والحمد لله في هواية
الغوص
و
التصوير تحت وفوق الماء

ما شاء الله ....... طب ما تبتدوا ياجماعة ....... يعنى كل واحد يعطى فى الأول نبذة مختصرة عن الهواية التى له خبرة فيها وهذا سيفتح باب الأسئلة من الأعضاء مش العكس ....... يعنى مش لازم تنتظروا اسئلة علشان تبدؤا ..... عايزين نبذة مختصرة من سما مصر عن تربية الحمام ومن القبطان عن أسماك الزينة والكلاب ومن الأمير أمير عن الغطس والتصوير تحت الماء وفى إنتظار فاين تاتش يقرر إيه الهواية التى له خبرة شخصية فيها ....... أنا عن نفسى أهوى المراسلة وتبادل صور الأشعة والتزحلق على الطين

أستأذن الأخ العزيز فاين تاتش بنقل الموضوع من باب الإقتراحات إلى باب الموضوعات العامة حتى نسترسل فى خواطرنا حول الهوايات المختلفة براحتنا لحين البت فى إقتراحه بتخصيص باب مستقل للهوايات من الإدارة ..... تحياتى

خلاص اتفقنا نتبادل خبرات الهوايات وبكرة أبتدى أصور لكم الحمام

ونجيب كباية الشاى الثقيل ونقعد نتكلم

وبالمرة ياحشيش كلمنا شوية عن التزحلق على الطين

وفكرنى بالذى مضى

والله كويس بس لما الباب يتفتح دلونى علية
اختكم يعنى ساعات بتتوه
خدونى فى ايديكم ماشى
اهو الواحد يفتكر شوية من اللى اتعلمة فى الكلية على شوية من اللى كنت بطبش فية فى البيت وكدة وربنا يستر
هههههههههه
بس اشكرك يا فاين على الافكار الرائعة دى والله

اشكر كل من رحب بهذا الباب اما من طنش فجارى البحث عنه هو انتم فى الادارة مش عندكم فيش وتشبيه لكل واحد؟ وبصمات صوابع رجله الشمال؟
و ساحاول بعون الله اضافه مواضيع عن تربيه الحمام والاسماك وطيور الزينه والنباتات وخاصه الصباروالعصاريات
بس ارجو ان تعذرونى فى قله الكتابه لانى باكتب بصوبع واحد مع انى والحمد لله عندى صوابع تانيه بس اميين . وحتى نلتقى فى حفظ الله وامانه جميعا .

طيب ياللا..

اللللللللللله موضوع ظريف ومفيد بجد

علي فترات متقطعة مريت بهوايات متعددة قط سيامي
وعصافير وسمك زينة وزرع
وكانت اجمل فترة الكلاب الولف ..كنت براعيها بنفسي
ومرة كان عندنا كلبة اسمها لاسي وحصل تزاوج بينها وبين ابن الجيران وانجبت 11
واستغربت طبعا العدد..وفضلت طول الليل جنبها..والاتنين كانوا من فصيلة اصلي
و كنت بساعدها
واوكلهم بالبيرون..لفترة وعاش منهم عشرة اتوزعوا وعاشوا بصحة

مهم جدا في تربية الكلاب بالذات النضاقة اليومية
خصوصا لو تربيتهم في قلب بيت مش جنينة
وكنت بلبسهم طوق بيتباع مخصوص لحشرة القراد او شامبو مخصوص
خصوصا انهم بينزلوا الشارع يوميا ..
وفيه كمان محلول بيخفف من وزارة الزراعة وده مفيد وقت الحمام
خصوصا لو عايش في جنينة ..والمحلول ده كان فعال جدا
لما نقلنا الكلب للشروق.
حشرة القراد بتعيش علي الدم وشكلها بشع
فمهم جدا عملية الكشف الدوري بعناية في ودانهم و شعرهم
وتطعيمهم باستمرار

كان عندي صور لو لقتهم هنزلهم لرينجو ولاسي

رينجو كان يشبه ده

حكاية علي الماشي
مرة رينجو عور نفسه مش عارفة ازاي لقيت دم جنب عينه
وحد بعتلي دكتورمتخصص..بجد تجربة كانت غريبة ليا
الدكتور طلب امسكه وهو بخيطله العين لان فجاة لقيت اللي في البيت اختفوا من حواليا

ومع صوت الالم اللي فيه تماسكت ..بس كان قلبي هيقف
وطبعا مع العناية بقي كويس ..

ومن تجربتي اللي يربي حيوانات عموما لازم يكون انسان صبور
علشان هو ميتعبش وميظلمش روح
كان عندنا كلب والغفير كان بيضربه يظهر دايما
اتحول لكلب بيخاف لما حد يقربله ..يعني كمان مينفعش للحراسة..

دلوقت عاوزين يجيبوا كلب في الشروق بس انا بقاوم الفكرة بكل قوتي
مع اني بحبهم جدا..لكن محتاجين رعاية مش مجرد نلعب معاهم شوية وخلاص..

دي خبرتي الصغننة بالنسبة لهواية تربية الكلاب اللي علي ادي

متابعة معاكم هواياتكم وتجاربكم ولو ليا فيها هشارك معاكم

انتوا بس قولوا يا نوووووووووورية و تلاقونى قدامكم
يااااااااااااا نوووووووووووووووورية

موافق وأدعوا اللهو الخفي ود. رجب ليزودونا بخبرتهم في التصوير والموسيقى

وأدعوا حشيش لتبادل صور الأشعة

وبخصوص أسماك الزينة
أول مرة جبتها من شهر تقريبا بناء على رغبة العيال
رحت للمحل أنا وصديق لي نشتري سمك وقلتله انا ماليش خبرة في السمك
هاتلي سمكتين تجربة يستحملوا العيشة المرة معايا
فجابلي سمكتين اسمهم تايجر
ومعلوماتي ان السمك لازم تجيبله فلتر وسخان
قالي مش مهم لانهم سمكتين بس والحوض كبير عليهم
واداني شوية أكل عامل زي الكورن فليكس عبار عن قشور لونها بني
قالي تحط لهم قشرة واحد كل يومين
العيال فرحوا قوي بالسمك
وفضلوا طوال الليل صاحيين بيتفرجوا عليه
تالت يوم روحت للحوض علشان أحطلهم أكل لقيتهم ماتوا
طبعا زعقت للعيال قلت أكيد لعبوا في الميه أو حاولوا يمسكوهم
واتصلت بصديقي اللى اشترى معايا السمك لقيت السمك عنده برضه مات
تفتكروا السمك مات علشان ايه
هل بسبب الوحدة ولا علشان عزل من بيت العيله ولا علشان ماعرفش ينام طول الليل من هيصة العيال ؟