أهههه
حضرتك كنت بتهزر.

طيب
أنا برضه كنت بهزر.

بس طالما حضرتك مبتستحملش الهزار، يبقى أحسن متهزرش.

بصراحه يا اخ مصري اوسكاسان مغلطش في حاجه انا كمان كنت عايزه اقولك صح النوم ابو حميد خلاص رجع
ومش عارفه فين الميه العكره اللي بيصطاد فيها دي

يا ريت يا اخ مصري تخف من حده ردك ..وتعكس اخلاق الاسلام في رودودك

وشكرا جزيلا

خلاص يا جماعة ..
أنا اللي غلطان ..
و بصراحة يا مصري ردودك أصبح فيها عدوانية غير مبررة و هذا في الحقيقة لوحظ في الفترة الأخيرة
أقصد قبل كدا كنت بتوصل رأيك بطريقة أحسن ..
أوسكاسان أكيس و أكبر منك و خابر الدنيا
تقدم بإعتذار و بصورة جادة
رديت إنت بتهكم و إستفزاز
هو كدا يكسب ..

إتعلم علشان ما تفضلش على طول تخسر و تخسرنا معاك
كلامي مفهوم موش عايز ذكاء يا صاحبي
و الحق ما يزعلش
في مثل مصري بيقول شيل دا عن دا يرتاح دا من دا ..
و دا الحل الأخير إذا كان التحاور بينكما يستمر على هذا المنوال

حضرتك قلت إنك حتغيب لفترة للإستجمام، أنا لم أجد داع من الرد، فهذا شيئ طبيعى، ولكن كثير من الأعضاء أحزنهم هذا وصوروا الموضوع على إنك حتسيب المنتدى للأبد، وبدأت رسائل المجاملات من نوع "مش قادر على بعدك ثانية".
فأنا أرسلت رسالة توضيح إن غيابك كان بسبب شحذ القوى للعودة بمواضيع مثيرة تجدد دماء المنتدى.

يقوم طالعلك صاحبيكا، ويقولك إنت لسه فاكر دلوقتى تبعت لأبو حميد، تفتكر نيته سليمة؟
طب ليه مقالش الكلام ده للأعضاء اللى كتبوا بعدى؟

دى جملة كان هوه حدفها من شهر وده كان آخر إحتكاك معاه حتى هذا الموضوع.
"عندما يفتح أحد المسلمين موضوعا في مظهره بحثا عن مقارنة بين المسيحية والإسلام دادادادادادا"

الكلام إليك يا جاره، وده تانى إحتكاك وبيقولك إنه كان بيهزر ونيته سليمة، بس المرة دى ذكر الإسم، المرة اللى فاتت حدفها من بعيد.

أبوحميد إنت عارفنى، أنا مبحبش النفاق،ولذلك لن أعتذر عن خطأ لم أرتكبه من أجل المظاهر.

ما حدش طلب منك إعتذار و لا نفاق
أنا بأقولك الكلام فن غايب عنك
فلما تحب تقول حاجة في كذا طريقة تقولها بيها
إنت بتختار الطريقة التصادمية
يعني لو حسيت إن حد بينبط عليك
ممكن تنبط عليه من غير ما يمسك عليك كلمة
و الحوار بيكون مشوق
أنا لا أقصد أن أحجر على أفكارك
دي إنت حر فيها
لكن بأقولك حكمة راجل عياله أكبر منك و لف الدنيا
و عاشرت ناس كتير و أدعي أني قابلت أكثر الناس عدوانية لي على الأقل بصورة شخصية و لم ينجح أحد في إستفزازي أبدا .. يعني قلت لهم رأيي الذي يخالف رايهم و سمعوه و لم يقدروا أن يهاجموني على رٍايي و كلماتي بل منهم من إعترف بصحة رايي
أطلب منك فقط
التروي و مزيد من الحكمة
هذا إذا قبلتها مني كوالد أو صديق أكبر
تحياتي

يا حاج مصري أنا شايف ان اللي انت بتعمله ده لا يصح.. وشايف انك أخطأت في حق المكان واللي فيه.. وتجاوزت ما كان يجب أن تراعيه.
فأرجو منك ومن كرم أخلاقك.. لو سمحت حاول بس ما تكررش ده تاني.. طبعاً ده بفرض كونك حريص على المكان وعلى مشاعر من فيه.
فإذا كان الأمر غير هذا.. فيمكن مواجهة هذه الحقيقة بشكل مناسب بحيث لا انت تتضايق ولا حد تاني كمان يتضايق.

شكراً لك.

ويا عم أوسكا..
أرجو أن تتقبل اعتذاري بشكل شخصي وأيضاً من واقع مسؤلياتي في المنطقة..

سلامات يا بُعَدا
هو فيه ايه
مين اللي مزعل ابو حميد بس

انا باقول يا ريس كارت أصفر
والا كاروهات
ويتوقف الماتش
خلي اللعيبة ترتاح شوية

يا أخ المصري
حساسيتك المفرطة بتتسبب بأرتيكاريا مالهاش لازمة
عندك دوا للحكة يا دكتور ابو حمد
صحيح حضرتك بتاع عظام
بس الناس العظام بنلاقي عندهم حتى فاليوم

طيب ماتدي للشباب قرصين من اياهم
يمكن يروقوا
ويهدوا

أخوكم أسامة الكباريتي
عضو عامل
مش هامل

نصيحة لوجه الله يا مصري

مش كل الناس زي بعضها ,,,

و اللى يعاملك بأدب و احترام , يستاهل انه يشوف الاحسن منه

فبلاش تخسر ناس محترمة ...


و ده حقيقي رايي في القضية

يعنى انت رزعت الراجل كام كلمة في وشه

بسبب ان ممكن تكون نيته فيها شك بالنسبة لك

بقولك إيه.

إنت فكر فى الإجابه لغايه الصبح، وعشان الصورة تبقى أوضح عندك، إفتح الأراشيف، وفكر بحياده بعد الإلمام بكافه جوانب الموضوع.

أنا الوقت متأخر عندى وداخل أنام.

وربنا يستر على اللى حيتكتب وأنا نايم، الواحد ملاحظ إن الصيادين كترو فى المنطقة وبقت قلق.

و لكن هذا لا يساوي , كلامك الناشف معاه يا هندسة

مش المفروض كل فعل له رد فعل مساو له في القوة و مضاد في الاتجاه

لا انت عملت دي و لا دي

قلقت فى النوم وقلت آجاى أبص، وعارف إنى أكيد مش حلاقى رد مباشر للسؤال.


وزى ما توقعت.


هوحضرتك تبع نيوتن؟

هو محدفش كوره وخبطت فى الحيطه يا أستاذ، دى مسألة أخلاقيه تقديرها بيختلف من واحد للتانى.

فيه ناس جتها منحسه ومبيأثر فيها خبط وناس تانيه عندها زوق ولما بتغلط ولو غلطه ضغنطوووطه تلاقيهم فى نص هدومهم.
وبعدين أنا كتبت قائمة طوييله بأعضاء زى الفل وكلامنا مع بعض على المستوى برغم إختلافنا فى القضايا محل النقاش، بس محدش فيهم بيحدف كلام من بعيد وبعدين يغطيه وبعدين ينشره بعد ما يذوقه. ويا ريت بعد أن أثبتنا فشل نظرية نيوتن فى الفيزياء للحكم على القضايا الأخلاقية منفتحش على أينشتاين ونخلط الكيميا بالفلسفه.

حروح أحاول أنام تانى، وربنا يستر وأرجع ألاقى هدومى مكانها.

وكل من له نبى .. يصــــــــــــــــــــــــــلى عليه (من الأقوال المأثورة لشويكار)


أعتقد أن المشكلة من أولها لآخرها .. ليست سوى سوء تفاهم "شخصى".
وأعتقد أن الإستمرار فى الكلام فيها، سيزيد من سوء التفاهم ولن يحله، وسيدخل أطرافه فى مشاكل أخرى لا داعى ولا معنى لها.

فبرجاء .. محاولة فهم الآخر، والإكتفاء بما قيل هنا حتى الآن، وتفادى هذا النوع من النقاشات مستقبلاً.


تحياتى للجميع

اخونا الفاضل المصرى
كنت لا اريد ان اشارك فى هذا الموضوع ولكن قول الحق يوجب على ان اقوله واعتقد انك تؤيدنى فى ذلك...
انا قرأت مداخلة العزيز اوسكاسان ومما لاشك فيه انه من النوع الذى يميل الى المزاح المؤدب دون الخروج عن احترام الشخص الذى يتحاور معه..وانا اعتقد حسب رؤيتى انك كنت جاف معه الى حد كبير وهو كان يريد ان يفهمك انك دخلت الى الموضوع بعد ان تراجع اخونا ابوحميد عن قراره.اراد ان يقوله لك بطريقه فيها نوع من المزاح...
ياريت يامصرى تحاول ان تكون الى حد ما غير جاف فى الرد وانا سوف اقول لك خللى روحك رياضية ومش حا اقول يجب ان تتسم بروح الاسلام لانى واثق انك تتسم بهذه الروح وياريت نتسامح حتى مع الذين يغلطون فينا وكله بحسابه يا المصرى...وشكرا لك
كتبت هذه المداخله ولم تكن مداخله اخونا العزيز هشام قد كتبت بعد والا كنت قد توقفت عن كتابه مداخلتى..حصل خير وصلوا على النبى

الأخ العزيز هشام

اسمحي بصفتي طرف في الموضوع أن أضع آخر مداخلة لي في هذا الموضوع

عزيزي المصري أقولها من قلبي وليس مجاملة

مداخلتك بالفعل لم أقرأها في حينها وقرأتها بالصدفة صباح نفس اليوم الذي فتحت فيه هذا الموضوع

أولا :

لم أرد في وقتها لان الرد السريع في حينه - قد يجعلني وأنا في قمة انفعالي - يؤدي إلى مشادة كلامية لاداعي لها
ففضلت أن أهدأ قليلا وارد عليك .

ثانيا :

ليس من اللائق أن نحول موضوع أبو حميد إلى غير ما فتح من أجله .

ثالثا :

رأيت وهذا ما في نيتي والله يشهد بذلك
إن مجرد الرد لا يفتح بيني وبينك حوار راقي بل مبارزة وتنابز ليس بيننا غالب بل نحن الاثنان في جانب واحد وهو الهزيمة . ولا انوي ذلك مطلقا سواء معك او مع غيرك
فقررت أن افتح معك حوار عتاب وأبدا بالاعتذار حتى نكسب نحن الاثنان أول جولة .

فاعتذاري ليس هزيمة لي ولا نصر لك

بل هو اتجاه في الطريق الصحيح لبدء تفاهم واضح بيننا .

ثالثا :

لم اعمل بنظرية ضربني وبكى وسبقني واشتكى كما تحاول أن تشبهني .

بل مددت يدي للمصافحة أولا

وفي أول رد لك أعرضت وجهك عني وأغلقت الباب في وجهي وقطعت حبل التواصل بردود جافة مستفزة .

رابعا :

ويعلم الله أنني أول مرة اعلم أن هناك شيئا ما بصدرك من ناحيتي
فلماذا لم تواجهني بما ضايقك منى من قبل ؟

إذا كنت وقتها اعتبرت أن هذه تفاهة لا ينبغي الالتفات إليها

فلماذا أثرت عليك في علاقتك معي ؟

أما إذا كنت تعتبرها إهانة لا تغتفر

ويجب الحكم على صاحبها بالمقاطعة ولا تحتمل مني أي مزاح أو مناوشة
فلماذا تتركني استمر في ذلك ؟
وأنت في صدرك شيء ما يجعلك متحفزا من كل كلمة اذكر أو انوه عنك فيها !


عن نفسي لو كنت انوي شكوى لما عاتبتك واعتذرت عن سؤ فهم لم اقصده
وعن نفسي أيضا أول ما شعرت منك بشيء
ماسارعت وفتحت معك حوار لإزالة أي شائبة قد تشوه علاقتنا كأعضاء في مكان واحد
ولم اترك الوساوس والأفكار تتحكم في علاقتي معك كما فعلت أنت

ليس من المفروض أن اذكر ذلك لكنك أنت الذي اضطررتني إليه
عندما أرسلت لك رسالة خاصة في مناسبة المولد النبوي
أنا لا يهمني موضوع المناسبة بذاتها ( أرجو من الجميع أن يتفهموا ما أقوله )
هل هذا لا يوضح لك انه لا يوجد بداخلي شيئا ما تجاهك ؟
ومع هذا لم تكلف نفسك عناء الرد
مع العلم أن بعضهم رد بكل احترام انه لا يعتبر هذا عيدا أو مناسبة تستحق المعايدة ولكن شكرني على التواصل

هذا ما أردت إيضاحه يا عزيزي ..... التواصل فقط

حاولت أن أضع بيني وبينك حبل للتواصل في مواضع مختلفة
منها مثلا يوم ما رأيتك في موضوع صباح الخير يا شئون .. ألقيت عليك الصباح وكالعادة لم ترد
توقعت يومها انك لم ترى المداخلة
ولكن اليوم أنت تثبت عكس ذلك

في زمن ما كان هناك بيني وبين احدهم صداقة
وفي وقت استغل فيه الشيطان ضعفنا البشري فأوقع بيننا
واستمرت القطيعة فترة طويلة
ونسينا سبب الخلاف ولكن ما تذكرناه ان هناك حاجز بيننا
في يوم ما في مناسبة ما تقابلنا صدفة
وأخذنا بعضنا بالاحضان كما ولم يكن هناك بيننا شيئا ونسينا كل شيء
فكل ما فعلناه اننا اتخذنا فرصة لمناسبة ما لانهاء ما بيننا

بالمثل في موضوعنا
انا لم ارك وجها لوجه
ولا اعرفك
وما بيننا ما هو سوى افكار واطروحات وردود
لا تستدعي الخلاف او القطيعة
ففي اول مناسبة نتبادل فيها الحوار او التهاني او العتاب
كنت اتمنى ان يتم تناسي ما حدث ونبدأ من جديد في صفحة بيضاء

ولكن ومن خلال ردودك في هذا الموضوع يبدو انك ترفض ذلك


عموما وفي النهاية
اكرر ما قلته لك سابقا

ربما يوجد بيننا اختلاف
ولكن بالتأكيد عن نفسي ايضا لا يوجد من ناحيتي بيني وبينك خلاف




أشكر جميع الاعضاء والمشرفين لمداخلتهم ومحاولتهم التهدئة





تحياتي

ربما تكون الحسنة الوحيدة لهذا الموضوع هي في كونه "رابسو سوبر" أشعر بأنه قد أخرج الرواسب وعمل تزييت للقلوب

وكلاكما عضو نشط
مثلي

ولن يتمكن أيكما من تحاشي الآخر عندما يلتقيه على ناصية موضوع أو في بقالة مناسبة

فكلاكما من النوع الإيجابي المؤثر في أعماله بالمنتدى

وكلاكما يكن لهذه الأرض الطيبة مودة وحرصا لن يصلح فيهما أن توجد على سطحهما جفوة لا أساس لها

لو كان كلاميهذا محض افتراء
وتخاريف
فيكفيكما ما قلتما هنا
وأعرضا عن كل ما قلت
وليدر كل منكما ظهره للآخر
خصوصا أن ماقيل أكثر بكثير مما يجب أن يقال

والتكرار فيه لن يفلح في رأب صدع
إذالم يكن قد افلح حتى الآن

بقي ان أقول
أنني قد احضرت معي 2 كيلو بن بالحب هال
يكفي لعمل قهوة لكل المنتدى

فتفضلا مشكورين
بارتشاف قهوتي
وألقيا على أكتافي
ما تحملان من عتب
والعتاب غسيل القلوب

ربما كنت لن أندم على تركي الإدارة
لو بقيت لدي خاصية واحدة
وهي شطب المداخلات
لذا
فإنني أستعيض عنها برابسو
لأغسل مافي قلبيكما
وأمسحهما بزيت "دهن العود"
ممزوجا بشئ من المسك

وليطيب خاطريكما



وصافي يالبن

خلاص يا إخوانا ..
عمونا أسامة قال اللي فيها ..
نقفل الموضوع على كدا .. و حصل خير ..
روحوا إقروا النكت بتاعته .. نسيت موش عارف فين !! بس هي هنا دور يا مصري يمكن تلاقيها تحت الترابيزة اللي جنبك دي .. و إنت يا أوسكا .. عايزين نشرب من إيدك كوبايتين شاي من المستورد اللي إسمه عجل جاري دا .. بس إغسل إيديك قبل ما تحلبه ...
عمو أسامه ... شغل لنا شريط سلامات يا حبايب يا حبايب سلامات بتاع البنت شاكيرا دي .. بس أوع تقول للبروف أصله ح يفرض علينا إرادته و يقول فرجوني على أغنية ليه يا بنفسج .. و أنا صالح عبد الحي باعت لي إنذار على يد محضر علشان ما قلتلوش هو زعلان ليه .. لحد ما طلع عليه الصبح .. ما هو أنا لو كنت عرفت هو زعلان من إيه كنت قلت له .. دا أنا دايخ ما بين الزعلانين هنا .. ألا يا عمونا هما كانوا زعلانين ليه ؟

وم اساسيات الصلح ان يتجاوز الطرفان عما شاب العلاقة ولا اجد ذلك موجودا
فطرفا يتمادى فى غطرسة الخفاء ولا اظنه يقيم اعتبارا لاحد الا لسكان تور ا بورا فذلك صلح من طرف واحد اذا قبله الغير وشرعوه دستورا للعلاقات بين الاعضاء فذلك عفوا لا يليق

أهلا أهلا خروماتشوف. مأنس ومشرف.

واذا الحالة يا ابو حميد وصلت للسكر اذن فاين الذين س........... عليهم

متقولش كده على نفسك يا أبوحميد، خورماتشوف بعيد عندك من اليسار، يعنى من أهل الشمال.

اللهم احينا من اهل اليسار وامتنا يساريين واحشرنا مع اهل اليسار

ما خلاص

اللهم يخرب بيته

على فكرة
اسلوب السخرية والصد
لا يتناسب مع تعاليم وروح وسماحة الإسلام

الى ان يدرك السادة الغيورين على الاسلام معنى الدعاء سأعود بمداخلاتى

يساري = شيوعي = ملحد


هل المعادلة مضبوطة ام هناك مستجدات لا نعلمها

يمكن إتش قاصده يسارى إقتصاديا يعنى تأميم واللى بيشتغل زى اللى مبيشتغلش كله بيقبض زى بعضه وبيشتروا الهدوم بالبطاقة، تلاقى الناس كلها لابسه نفس الموديل ونفس الألوان، شفتهم فى كوبا حالهم يصعب على سمارتو.

أنا مقلتكوش، مش أنا طلعت على كوبا الصيف اللى قبل اللى فات. كانت عايزاك دى يا إتش، أصلهم بيتكلموا أسبانى وأخوك أبيض. ولقيت هناك متحف للإتحاد العربى الكوبى، أتارى لينا تاريخ طويل فى كوبا وإحنا مش داريين. من أيام الأسبان المسلمين اللى كانوا مخبيين إسلامهم وطلعوا مع كلومبوس ولما جت الفرصه حاربوا الأسبان ،وفيه أسماء كتير مشهورة للأسبان المسلمين وصور محطوطه فى المتحف، وشفت برضه مصحف ذهبى من العصر ده، كانوا مخبيينه وبيعدوه من جيل لجيل. تانى موجه من العرب كانت التجار اللبنانيين، بس كله طفش لما جاه كاسترو وطلعوا على البرازيل لإن كان بيأمم كله ومبيرحمش.

مع انك مقلتش حاجة عن اليسارية و هل هي طريقة من احدى طرق الشيوعية كالماركسية !!

و لكن هنستنى اما يجي ماركيز و يقولنا هوا من انهى صنف من التلاتة اللى قلت عليهم يا اتش !