رؤية جديدة للحياة الزوجية السعيدة .!, دعوة عامة للمناقشة حول الرؤية .!!! خيارات

[Badroora]

اخواتى الاعزاء سواء المتزوجات او الانسات مثلي .
يعلم الله انى فتحت هذا الموضوع من اجلكن ومن حرصي الشديد على مصلحتكن ,وما سوف اخطه اليوم هو حصيلة متابعة وترقب اكثر من 10 سنوات .
اخواتى الاعزاء انا لست ام ولست زوجة ولكنى ام بالتبني لاخواتى وصديقاتى والحمدلله اتعقدت رسمي رسمي من هول نتيجة التجربة .
انا من النوع الذي لا يستفيد ابدا من خبرات الاخرين لانى مؤمنه جدا ومقتنعة بان لكل منا ظروفه الخاصة اذن ما يطبق على لا يصح ان يطبق على الاخرين نظرا للفروق الفردية سواء الاجتماعية او البيئية المحطية بنا .
دا مبدئي فى الحياة فى كل شيء ماعدا الزواج الى هنا وتوقفت. لا استطيع ان اخاطر بتجربة عشان اشوف يا تنجح يا تفشل .
لن اطيل عليكم ندخل فى الموضوع .
من خلال الخبرات المكتسبة من المحيطين سواء اخواتى ,اقاربي , اصدقائي .
ان كلنا تربينا على الاتى .
الطاعة العمياء للزوج
طلباته فى الدرجة الاولى
وفريله الاستقرار
اوعى صوتك يعلى على صوته
اوعى وهو راجع من شغله ومكشر تسأليه مالك او تكشري فى وشه
لما تحبي تناقشيه فى حاجة اختارى الوقت المناسب والظرف المناسب ايضا .
اوعى تحمليه فوق طاقته
كونى ام
كونى اخت
كونى زوجة
لو فى ايدك ايه اوعى يرجع من الشغل يلاقي البيت مكركب وهدومك مش نظيفة
لازم تتزينى وتتعطرى وتبقي على سنجة 10 عند قدومه للبيت .
الاولاد دايما تراعيهم ويبقوا متحميين ولابسين كويس .
البيت خليه المكان اللى يحب يرتاح فيه .
يعنى من الاخر كونى مسخرة لراحة سعادة جنابه وكونى جاريته ولبي كل طلباته
وانتى بقي الله معكى .
طبعا كلامى دا لا اعمم به كل الناس الا الفئات اللى تعاملت معها يعنى كلامى دا مش استاندر بيحصل مع كل الناس .
المشكلة هنا
ان الراجل لو استقر فى بيته بيتعب زوجته وينهار البيت ..!!!! ازاى الكلام دا ؟!!!!
الرجل عندما يثق فى رزوجته ويطمئن ان البيت عنده مستقر وولاده كويسين طبعا الفضل يرجع للزوجة مش ليه .
يقوم هو بقي يبدأ يفكر فى نفسه , زوجته خلاص اتعود عليها وبقي لا يطقها ولا يقدر على بعدها يعنى بقت جزء منه زيها زى امه او اخته ميقدرش يستغنى عن وجودها فى حياته لانها توفر له الامن والامان والاستقرار بالمنزل .
ولكن هو بقي حاسس ان حقه مهضوم محتاج اللى تدلعه وتكون فضياله مش مشغولة ب5 عيال وبيت ومسئولية
هنا يبدا الزوج يفكر فى زوجة تانية عشان تشبع حقه المهضوم فى ولاده .
ولو حد قالة ليه كدا هى قصرت معاك ؟
يقولك الشهادة لله لاء
طيب فيها عيب ؟
يقولك الحق ينقال لاء
طيب مهملة فى نفسها ؟
يتنح وبعد تفكير عميق ويهرش فى راسه ويقولك ماهو اصل .....
اذن هو خلاص مطمئن ان فى زوجة مستنياه فى البيت , وولاده فى احس حال يبقي ليه ميشوفش نفسه بقي ويعيشله يومين .
طبعا الكلام دا حقيقي ودا اللى لمساه ولمسته مع الفئة اللى تابعت حالتهم وعشت مشاكلهم والحمدلله شغالة مصلحة اجتماعية الايام بس لسه مخربتش بيوت يا مسهل
المهم
لو الزوج لقي الاتى
زوجة مطلعه عنيه بس بلطافة مش بزهق وقرف
لو حشرته فى كل كبيرة وصغيرة بالبيت عشان يحس انه اب وكبير ومسئول مش نوغه يغسل ايده من المسئولية ويروح يشوف نفسه .
ان كل مشكلة كبيرة وصغيرة لولاده تحطة هو قدام المدفع وتساعد من بعيد .
ملهاش دعوة بمصروف البيت هو اللى يفكر ويصرف وهى اللى عليها الباقي ,,,, كدا مافيش مشاركة ؟ لاء ليه فيه طبعا ماهى هتطبخ وهتكمل الباقي .
المهم بقي هو تنضيف جيوبه او باول ,,, دى طريقة بلدي ومش بروفيشونال الكلام دا فى اول التعامل لكن اى زوجة مثقفة ومتعلمة لما جوزها يفكر يتجوز عليها بتكون مجروحة زيها زى اى ست بغض النظر عن الفروق الاجتماعية بينهم الجرح جرج .
المطلوب من كل زوجه انها تقوم بدورها اللى ربنا وصاها به على اكمل وجه دون تقصير مع مراعاة حقوقها وتخلى عنيها على جوزها .
ونصيحة بقي اى ست متجوزة مافيش حاجة اسمها خصوصية بين الزوج وزوجته لازم تقلب المسنجر بتاعه وتفليه وكمان الموبايل لان صدقونى لو معظم الستات فجأة تخلت عن مبدا الخصوصية اللى بيحمى الازواج دا وعملت تفتيش مفاجيء هنلاقي معظم الستات فى المحاكم طالبين خلع .
لان كل رجل ديمقراطى عصري مودرن بينادى بخصوصيته فقط وتلاقي بلاوى على اميله وموبايله .
وطبعا الست المسكينه مافيش خصوصية وطبعا انا ديمقراطية اوبن مايند بس بردة ضد ان الزوجة يكون ليها اصدقاء رجال وهى متزوجة.!!
اصدقاء عمل اوك داخل العمل اصدقاء مشتركين بينها وبين زوجها اوك
لكن نظام خصوصيتى وخصوصيتك واصدقائي واصدقائك انا كشرقية لا اقبله ابدا ولا انادى به لا لنفسي ولا لاحد من المقربين لى ولكل منا قناعاته الخاصة بشأن هذا الموضوع .
انا اللى طلعت به من الموضوع دا
لازم الزوجة متكوش معتمده اعتماد كامل على الرزوج يعنى بالبلدى ميكنش ولى نعمتها اللى من غيره تضيع وتنهزم
لازم يكون لها ذاتها وتكون قوية سواء ماديا او اجتماعيا حتى لا تنهار من بعده
تكون ذو شخصية قوية ولا تقبل اى وضع فى سبيل البيت ووالاولاد وسمعة المطلقة والكلام الغريب دا
مافيش حاجة فى الدنيا تجبر اى سيدة انها تكون تحت رحمة زوج او تربي ولادها فى جو اسري غير صحي فى سبيل كلام لا يودي ولا يجيب
هى بقوتها وبفلوس ابو ولادها هتربيهم وهتكبرهم احسن بكتير من وجودهم فى جو اسري عقيم لا يخلو من المشاكل والشجار بين الزوجين
وكمان متنسيش انك بردوا اللى كنتى بتربي وانتى مع زوجك هو شغلته انه يجيب الفلوس ووقت الفراغ يا اما ماتش يا اما نت وانت بتخدمى عليه .
الزوجة لازم تكون متجدده بحيث متكونش عادية او روتينية بحيث كل مازوجها يدخل البيت يلاقيها بشكل جديد انا عارفه انه متعب بس معلش التغير شيء كويس
وهو بردوا يعنى لازم بردوا يتجمل لها ميقعدتش يعيب عليها وهو مكعبر وشعره منكوش ودقنه طويلة
ومن حقك تنتقديه زى ما بينتقدك مش هو يدي لنفسه الحق انه يقولك شعرك ابيض وهدومك معرفش ايه
وهو طبعا اجارك الله
لا تتنزلى عن حقك فى الخروج والفسح طبعا على حسب ظروفه ولا تتنزلى عن حقك داخل البيت
يعنى ميشتغلش طول النهار ولما يرجع يبقي يا تليفزيون يا نت يا نايم وانت اخبطى راسك فى الحيط لاء طبعا كونى قوية ولازم يسمعك ويكلم معاكى وتشركيه فى كل مصيبة فى البيت
فى الزمن دا مبقاش حد يستاهل انك تخبي عنه حاجة عشان ميزعلش لاء نكدى عليه وانتى الكسبانه
وزى ماهو عاوز حنية الام خليه يحسسك برعاية الاب
وبالتوفيق ان شاء الله
مع تمنياتى بحياة زوجية سعيدة هانئه
ملحوظة
هذا مجرد راى ووجهة نظرى الخاصة
لا تعنى انى صح ولا تنادى بان هو دا اللى المفروض يكون
ولكلا منا ظروفه الخاصة وطريقته فى ادارة حياته
مع خالص تحياتى ...
بدرورة


تم تحرير المشاركة بواسطة Badria Mekkawy: Aug 1 2008, 04:26 PM