فيلم " الريس عمر حرب " نقطة سوداء فى تاريخ المخرج خالد يوسف .! خيارات

[Badroora]

إحم إحم اعزائي المشاهدين موعدنا مع فيلم هذا الاسبوع هو فيلم

( الريس عمر حرب ) قصة هانى فوزى ... اخراج خالد يوسف .

بطولة خالد صالح .. هانى سلامة ...سمية الخشاب ..غادة عبد الرازق .

تدور قضية الفيلم التى من راى مالهاش اى لزمة حول الاحداث التى تدور داخل نادى القمار (كازينو)

خالد صالح .. كان صاحب الكازينو والمسيطر على كل شيء .

هانى سلامة .. كان عامل فى الكازينو

سمية الخشاب وغادة عبد الرازق كانوا بروستتيوت فى الكازينو.

بصراحة الفيلم .. مقدمش رسالة ولا كان بيناقش قضية كل اللى كان فيه هو عبارة

عن مشاهدة مخلة وخلاص وكمان الفيلم اللى شفته كالعادة مشفر يعنى اللى

اتعرض فى مصر كان اسواء من اللى شفته هنا ومع ذلك كنت مستائه جدا جدا

سؤال بقي هل فعلا فى نوادى قمار بالفنادف وفعلا بيحصل كدا.؟

معذرة انا المرات اللى دخلت فيها فنادق كبيرة يا اما بنحضر مؤتمر او حفلة تبقي

المستشفي عملاها وبتكون طبعا محترمة مافيهاش غير اكل

يعنى باختصار اقدر اقول الى زينا بيدخل الفندق يا اما للجامع اللى فيه او لاماكن معينة محترمة .

ومعنديش فكرة هل فى كازينوهات قمار كدا فى مصر وفى مناظر مخلة كدا حقيقي؟

الفيلم كان سيء وحتى الممثلين كانوا سيئين يعنى هانى سلامة دا شنبه ودقنه هما راس ماله

وكان حلقهم فى الفيلم وكان شكلة عره بصراحة

سمية الخشاب وغادة كانوا بيتنافسوا فى العري والفساتين اللى تكشف اكتر ما تستر .

واللغة والالفاظ المتدنية بينهم بصراحة مكنتش فاهمة هو خالد يوسف كان عاوز ايه من الفيلم.

مين فينا بيهموا بتوع القمار ولا حتى فضولة بيقتله انه يعرف عنهم حاجة حتى القصة كانت تافهه ومكررة

يعنى القصة كلها عبارة عن مشهد جانبي لاى فيلم مش فيلم كامل على كازينو

وكمان الاسخن وادل من كل دا مش العري ولا المشاهد المخلة لا كل دا كان

ارحم من التعدى على الذات العليا.

مش فاهمة ايه المقصود من كام لفظ كدا قالهم بطل الفيلم بغرور وكبرياء ولكن على مين على المولى عز وجل .

اول حاجة مشهد كان بينه وبين هانى سلامة وقاله المفروض تكون اله نفسك .!!! دى اول ساقطة

التانية ... مشهد اخر بيقوله انا ملك الحظ اللى بايدي كل شيء املك كل شيء

طبعا نظرة العين وتعبيرات الوجه كان فيها تحدى صريح وثقة بالنفس منفرة .

تالت حاجة مشهد اخر بينه وبين هانى سلامة وقاله انا اقدر احميك من اى مخلوق فى الكون

وانا الوحيد اللى اقدر احميك مافيش غيري .. بصراحة قلبي وجعنى اوى اننا خلاص تعدينا كل حدود الادب

وبقينا نتحدى الذات العليا حتى لو بالكلام ومجرد تمثيل بردوا شيء مرفوض لاء والساذاجة بقي ان

هانى سلامة لما قاله قاله استغفر الله العظيم .!!!

بجد فيلم فاشل وساقط ونقطة سودة فى تاريخ المخرج وابطال الفيلم .

استراحة قصيرة وبعدين ارجع احلل المشاهد ونقطع فى فروة الممثلين والمخرج

ابقوا معنا فاصل ونواصل

الناقدة السينيمائية

نجفة الضب





تم تحرير المشاركة بواسطة Badria Mekkawy: Jul 26 2008, 11:58 PM