مطبخنا يا مطبخنا .... خيارات

[Guest_itsme_*]

اما الكعك او الكحك بقة المرة الجاية

[elbana]

هنا ، أضع بين أيديكم وصفة طاجن العكاوي بالبصل ، والعكاوي دي بقى ولا (عكاوي القهاوي) وأكيد فيه بعضنا ما يعرفش إيه هي العكاوي ، والعكاوي في الزمخشري هي ذيل الذبيحة ، وهي عبارة عن فقرات عظمية محاطة بفصوص من اللحم الأحمر الطري الملمس ، وهو أفضل من باقي اللحم في الذبيحة لكونه لا يحتوي على الألياف الخشنة (النساير) الموجودة في باقي لحم الذبيحة ، وهذا أمر لا يعرفه إلا الخبراء أمثالي .

طريقة العمل :
نقوم بغسيل العكاوي جيداً ، ثم نرش عليها بعض الملح والفلفل ونتركها لبعض الوقت .
نقوم بتقطيع عدد حوالي 5 إلى 6 بصلات متوسطة الحجم ويكون التقطيع على شكل أقواس أو (جوانح) كما يقول أخواننا اللبنانيون ونقوم بدعكه بالملح والفلفل .
نقوم بدق عدة فصوص ثوم مع الملح والفلفل .
نحضر طاجن فخار وندهنه بالسمن البلدي (ملعون أبو الكولسترول) ثم نقوم بوضع البصل والعكاوي (بعد غسلها من الملح والفلفل) والثوم وخلطهم جيداً في الطاجن ، وضيف إليه الحبهان ونبشر عليه بعض جوزة الطيب ونضع المستكة وورق للورو .
نقوم بتغطية الطاجن بورق الألمونيوم ونضعه في فرن متوسط الحرارة ويترك لمدة حوالي 45 دقيقة ثم نرفع عنه ورق الألومنيوم ليحمر الوجه قليلاً .

ثم يقدم مع الأزر بالشعرية ، وبعض المخلل المحترم .
وملعون أبو الكولسترول .

[Guest_itsme_*]

الله الله الله يا اخ بنا على طريقة العكاوى ..و على رأى هشام ملعون ابو الكلسترول :evil:
بس يا اخ بنا هو هشام مستعجل قوى على الكحك تقوم تكتب له العكاوى برده ؟؟ :roll:
لأ و إيه ده طالب الوصفة منى انا شخصيا ..والطريف فى الموضوع ان الحاجة ام إتس مى لسه يا دوبها وفى نفس اللحظة الى انا ب اتصفح فيها باب مبخنا يا مبخنا بتقوللى شوفيلنا و صفة جديدة للكحك ل أحسن بتاعت العيد الى فات كانت منشفة الكحك شويتين :roll: و مفرفتة البتيفور شويات :roll:
انا قلتلها بقه احلى طريقة للكحك هو ان احنا نركب العربية قبل العيد بيومين و نمشى طوالى و بعدين نحود شمال و نطلع الكوبرى و ننزل من عليه ..نلف الميدان . وبعدين نشوف ركنة فى اى جراش قريب من عبد الهادى الحلوانى او حلوانى العبد او تسيباس و نعافر فى الزحمة و نجيب احلى 2 كيلو كحك فى الدنيا :twisted: :D
يا سلام ..اظن الوصفة سهلة
طبعا هى بصيتلى بصة انا لسة بأفكر فى معناها لغاية دلوقتى :roll: :roll: :roll: :roll:

إيه هو فيه إيه !!!!!!هو انا غلطت والا إيه :roll: :roll: :roll:

[Guest_itsme_*]

امممممم انا بأقول الطيب احسن :roll: :roll: و الموضوع ما يستاهلش ازعل الحاجة منى :roll: هو انا ليا بركه الا هيه :D :D :D :D وبعدين الولاد برده بيستنوا العيد علشان يقعدوا يعجنوا و ينقشوا و يرصوا الكحك مع ستهم :roll: :)
شوفوا يا جماعة اليكم طريقة عمل الكحك و مش اى كحك ده كحك العجمية الشهير بتاع اتس مى
................
كحك اتس مى الشهير :twisted: :twisted: :twisted: :twisted: :twisted:
-----------------------------
المقادير

5 ونصف كوب دقيق – 2 كوب من السمن – ملعقة كبيرة رائحة الكعك – ملعقة كبيرة خميرة جافة – 2 ملعقة سمسم محمص – ربع ملعقة صغيرة من الملح – ملعقة كبيرة سكر .

مقادير العجمية : 3 ملعقة سمن – 2 ملعقة كبيرة دقيق – ملعقة سمسم محمص – كوب عسل أبيض – نصف ملعقة صغيرة رائحة الكعك – 2 ملعقة كبيرة جوز مغربى .

طريقة عمل العجمية

اقدح السمن يا هشام ثم ضيف له الدقيق ورائحة الكعك يا هشام وقلب حتى يصفر لون الدقيق ثم ارفع الاناء من على النار وأضيف العسل بالتدريج مع التقليب الجيد قوى رجع الاناء على النار مع الاستمرار فى التقليب حتى يغلظ قوام العجمية وتنضج " لاختيار نضجها خذ قطعة منها وضعها فى إناء فاذا تكورت ولم تلتصق بالأصابع فهى ناضجة " ارفع الاناء من على النار :evil: بس حاسب من النار :twisted: واتركه حتى يبرد ثم احتفظ بالعجينة للحشو .
ما تاكلهاش دلوقتى :twisted:

طريقة عمل الكعك بقه
------------------------
ينخل الدقيق مع رائحة الكعك والملح ويضاف السمسم ويقلب يقدح السمن جيدا ثم يصب فوق الدقيق قلبه بملعقة خشبية حتى تهدأ حرارة السمن ثم افرك العجين جيدا بإيدك حتى ينعم أضف الخميرة والسكر والماء والدافئ واعجن كويس يا هشام :x بعدين قطع العجينة على شكل كرات متساوية واحشى كل منها بمقدار من العجمية وبطط كويس الكرات بإيدك يا هشام وانقشيها بالمنقاش نقشة حلوة تفتح النفس يا هشام ..رص الكحك رصة حلوة على صاج الفرن وإذا كنت هتدخله فرن البيت فلازم يكون الفرن متوسط الحرارة وعند التقديم يوضع فوقه السكر البودرة طبعا زى ما كلنا عارفين

ماليش دعوة بقة بالى هيحصل بعد كده .. :twisted: :evil: :evil: .

[Hesham]

يا شيفنا يا بنا يا عظيم، الواحد مش عارف يعمل إيه من غيرك. تسلم وصفاتك.
عكاوى يا إتس، عكــــــاوى، شايفة الكلام، إصحى معانا.

يا بنا، على فكرة هنا العكاوى برضه ليها ناسها، بس بيأكلوا عكاوى الثور مش حاجة تانية، وإسم الأكلة (علشان لما مرة تيجى هنا وتحب تجرب) "رابو دِ تورو" Rabo de Toro
وأى خدمة 8)

[elbana]

سبحان الله نفس اسم العكاوي في الحسين :lol: :lol: :lol:

[Helwa]

كل سنه و انتم جميعا بخير 0000بعد ما أكلنا جميع الوصفات الشهية اللي وصفتوها ابتداءا من كنافة نابلسية 000 و عكاوي بالبصل الي الكحك و البتي فور 000 أعتقد أنه لابد و حتما أن نبدأ الصيـــــــــــــــــــــام من جديد :lol: :lol: :lol:

[Hesham]

لا لا لا
صيام إيه دلوقت يا سندريللا؟ ده كلام؟ إحنا لسنا بنفطر يا شيخة :roll:
خلى الصيام بعد الوصفة الجاية والنبى، لحسن محتاس فيها

مطلوب وصفة عمل المخلل بأنواعه يا أساتذتنا (مذكرين ومؤنثين)
الزيتون، الخيار، الجذر، البتنجان (الباذنجان لحسن حد يعترض على اللغة) ...... إلى آخره
ممكن؟
شكراً
8)

[Helwa]

يا هشام باشا 000 أكل تاني 000 حرام 00 كفاية 000 واضح انك نسيت تشتري كتاب أبلة نظيرة 000 لأ دا راح عليه خلاص عليك و علي
wasfasahla.com
nestle-laziz.com

و بالهنا و الشفا 00000

[Hesham]

:cry:
يارب ليه دايماً تحط فى سكتى ناس يقفلوا عليا؟

فيه إيه يا سندريلا بس؟

هو أنا طلبت حاجة عويصة؟ ده طرشى يا سندريلا، هو عيب؟
وبعدين لعلمك طريقة عمله مش طالعة فى أى كتاب.
وكمان الوصلات بتاعتك ما بتفتحش

وحأفضل أزن لحد ما أعرف بيتعمل إزاى :P