أنقذوا مبانينا القديمة الجميلة, إللى فاضل منها خيارات

[فانتوماس]

بحب إسكندرية اوى...بس بقالى فترة حاسة أن انا غريبة و إن مش هى دى إسكندرية إللى أنا عارفاها
و إللى عشقتها و إللى ناس كتير من مختلف الجنسيات حبوها و عشقوها. البيوت القديمة بتتهد و يطلع مكانها ابراج سكنية او مول او سنتر و ملامح إسكندرية الحقيقية بتتمسح لما بقت شكلها مسخ.
دلوقتى و انا سايقة فى شوارع إسكندرية بلاقى نفسى بدور على البيوت القديمة او اى ملامح من المدينة إللى انا عارفاها و اسأل نفسى يا ترى المبنى ده هيفضل هنا لحد إمتى؟ يا ترى هيعدى وقت قد إيه قبل ما يطلع مكانه برج عشرتشر دور!
الكلام ده الحقيقة مش فى إسكندرية بس ..فى مصر كلها! مبانى عريقة لها تاريخ تتهد او يطلع حواليها مبانى اخرى بستايل معمارى مختلف تماما تؤذى العين. مش عارفة هو إحنا للدرجة دى الجمال مش بيهمنا..هى الناس مش حاسة قد إيه بقت كل حاجة من حوالينا قبيحة و مش منظمة؟!
بصراحة دى حاجة من الحاجات إللى محسسانى بإكتئاب شديد و بقيت حاسة إن انا مليش مكان فى البلد دى ..زى ما البيوت القديمة الجميلة بتتهد و تروح الناس كمان بتتغير و التعامل اليومى بقى صعب اوى.

لقيت نفسى بتخيل ..يا ترى كان هيبقى شكل إسكندرية إيه لو كان أتعملت خطة من 1920s مثلا لتخطيط إسكندرية..بمعنى إن يبقى فيه قوانين و قيود تحكم اى بناء جديد ..يبقى الطراز المعمارى متجانس مع بعضه و يبقى فيه صيانة للمبانى القديمة و حفاظ على المبانى اللى ليها تاريخ..و كان يحصل توسع برضه بس بشكل مختلف..يعنى كل المبانى الحديثة او العمارات الجديدة العالية و المولات و الذى منه يتبنى فى منطقة واحدة بداية من سموحة و فى إتجاه كارفور و بعدها..زى فى باريس كده..حى la defense فيه كل المبانى الحديثة العالية و Office buildings
يتهيألى كانت إسكندرية بقت مختلفة تماما! و كانت أزمة المرور إللى بنعانى منها دلوقتى إختفت..و كان الواحد هيحس بمتعة و هو ماشى فى شوارعها ..يشم هواها التظيف..
كل ما اتخيل الحاجات دى أكتئب اكتر و اكتر..بشوف قصور و بيوت تتباع و اعرف إن خلاص مش هشوفها تانى.. واتخيل يا ترى مين كان عايش هنا اول ما إتبنى ..يا ترى كان يعرف إن هيوصل الحال لكده؟ اعرف اصحاب بيوت فى زيزينيا و جليم و بولكلى و كفر عبده إضطروا يبيعوا بيوت اجدادهم لأن التكلفة بقت عالية اوى عليهم عشان يعيشوا فيها لأنها بتحتاج صيانة و مصاريف كتير و فيه ناس يعرض عليهم اسعار خيالية فيبستسلموا.
فى ظل الإكتئاب ده حسيت مؤخرا بأمل طفيف لأنى عرفت إن فيه مجموعة مش قليلة من الناس بتفكر زى ما انا بفكر و فيه منهم ناس بيحاولوا ينشئوا مجلة تصدر اربع مرات فى السنة تتوعى الناس عن المبانى القديمة و بيحاولوا يعملوا حملة تبرعات عشان يعملوا renovation لمبانى كتيرة فى كل انحاء مصر.
ده مش كفاية طبعا..بس يا ترى إيه ممكن تانى يتعمل..إيه القانون اللى ممكن يمنع مبنى من إنه يتهد و تحافظ عليه الدولة؟

تم تحرير المشاركة بواسطة فانتوماس: Nov 8 2007, 04:10 AM

[فانتوماس]

هحطلكم صور لمبانى كتير فى إسكندرية و القاهرة عشان تشوفوا التحف بتاعتنا..للأسف فيه ناس
كتير مش عارفة إن دى زى اثارنا بالضبط لازم نحافظ عليها ..ده تراثنا و تاريخنا..كل الدنيا بتعمل كده إلا
إحنا..

معظم الصور دى مش من تصويرى ..من تصوير ناس مهتمة بالموضوع ده زيى او من الإنترنت و هتلاقونى كاتبة ان الصورة منقولة

[فانتوماس]

منقول

قصر سباهى فى رشدى على البحر
لو عديته من جنبه القصر جميل جدا ..بس فى حالة يرثى لها و محتاج فعلا شغل كتير عشان يبقى
زى الاول


منقول

قصر عائشة فهمى فى جليم
كان عليه مشاكل بين الورثة و شركة إيجوث و بعدين الورثة كسبوا القضية و قالوا مش هيبيعوا
من إسبوعين معدية من جنب القصر لقيتوا مفتوح و مجموعة من الأجانب ..شكلهم مستثمرين واقفين يتناقشوا عند البوابة و بعيدن سمعت إن الورثة هيبيعوا خلاص و هيتحول لفندق خمس نجوم بس يا ريت مايبقاش كارثة تانية زى سان ستيفانو لأن القصر فى حالة جيدة جدا و إن كان لابد يتحول فندق فيبقى زى السلاملك فى المنتزة و يحافظوا على المبنى الاصلى

[فانتوماس]

منقول

المبنى ده من اكتر المبانى إللى بحبها فى إسكندرية...مكانه محطة الرمل على البحر. مش عارفة ده رأيي لوحدى بس انا شايفة أنه جميل جدا و لو تأملتوا فى تفاصيله هتحسه إنه تحفة فنية.


منقول

فى الصورة دى تقدروا تشوفوا تفاصيل المبنى..venetian style حاجة فى منتهى الجمال


منقول

ودى صورة تانية للمبنى إللى جنبه برضه تحفة ..يا ترى حد عنده اى معلومات عن تاريخ الإتنين دول او المهندس المعمارى إللى صممه؟

تم تحرير المشاركة بواسطة فانتوماس: Nov 8 2007, 12:26 PM

[فانتوماس]

منقول

فندق سان ستيفانو القديم....لما بشوف صوره قلبى بيوجعنى و بتحسر فعلا


منقول

سان ستيفانو جراند بلازا...فى رأيى ده كارثة..مفهوش اى نوع من الجمال..عبارة عن concrete monster
العقل و المنطق بيقول إن مشروع بالحجم ده ميتعملش فى منطقة زى دى..الlandscape مش متناسق خالص مع بعضه و بعدين بقى على طول فيه أزمة مرور فى زيزينيا و سان ستيفانو من وقت ما المشروع ده إتعمل.

تم تحرير المشاركة بواسطة فانتوماس: Nov 8 2007, 12:37 PM

[فانتوماس]

منقول

الصورة دى لقصر فى حى السيدة فى مصر و للأسف الشديد..خلاص اتهد..طبعا هو كان مهمل
crumbling away مش عارفة وزارة الثقافة دى فين ولا بتعمل إيه و إزاى مفيش جهة تحافظ على المبانى دى


منقول

الصورة لنفس القصر اللى خلاص مالوش وجود دلوقتى...حاولوا تتخيلوا القصر ده كان شكلوا إيه فى ايامه الاولانية لما كان لسه فيه ناس عندها ذوق

تم تحرير المشاركة بواسطة فانتوماس: Nov 8 2007, 12:48 PM

[زعلان]

فعلا تراث انساني بيروي حكايات و قصص رائعة وجميلة تسمح لنا على الاقل ان نسرح بخيالنا في ازمنة لم نعاصرها للاسف الفساد و الفساد و الفساد و البلطجة طالت كل شيء في مصر

[فانتوماس]

[قمر الليالي]

تفاصيل المبنى جميلة جدا



يعني المول وخلفه المبنى....مين الي بيخطط وازاي مفيش تنسيق

[ناصر الملك و الم...]

موضوع جميل يا فانتوماس